Senatorlar Qyzylordada bilim berý júıesin transformatsııalaý jáne bala quqyǵyn qorǵaý máselesin talqylady
ASTANA. KAZINFORM - Senattyń Áleýmettik-mádenı damý jáne ǵylym komıtetiniń depýtattary Qyzylorda qalasynda «Bilim berý júıesin transformatsııalaý jáne balalardyń quqyqtaryn qorǵaýdyń basym aspektileri» taqyryby boıynsha kóshpeli otyrys ótkizdi. Kezdesýge qatysýshylar ulttyq bilim berý júıesin odan ári jaqsartý, mektepke deıingi, orta, tehnıkalyq jáne kásiptik bilimge qol jetkizý men sapa máselesin, sondaı-aq balalardyń quqyqtaryn qorǵaýdy jáne ınklıýzıvti bilim berýdi qamtamasyz etý taqyrybyn talqylady.
Komıtet tóraǵasy Nurtóre Júsip otyrysty asha kelip, qazirgi qoǵamnyń basty mindetiniń biri – bilim berý jáne óskeleń urpaqtyń tárbıesi ekenin atap ótti. Ol jastardyń damýyna, ómir qundylyqtary men básekege qabilettiligine jáne eldiń bolashaǵyna áser etedi.
«Ulttyń jetistigi bilim deńgeıine baılanysty. Memleket óskeleń urpaqtyń bilim deńgeıin, onyń jyldam ózgeretin álemge tez beıimdelý qabiletin arttyrý úshin bar kúshin salýda. Búgingi tańdaǵy bilim berý júıesi – maqsatty túrde uıymdastyrylǵan qarym-qatynas pen áleýmettik normalar júıesi bar áleýmettik ınstıtýt. Ol belgili bir qoǵamǵa, onyń suranysy men áleýmettenetin adamǵa qoıylatyn talapqa saı kelýi tıis», - dedi Nurtóre Júsip.
Іs-sharaǵa Qyzylorda oblysynyń ákimi, Oqý-aǵartý mınıstrligi Orta bilim komıtetiniń, oblystyq máslıhattyń ókilderi jáne bilim berý salasyndaǵy sarapshylar qatysty.
Qyzylorda oblysy bilim basqarmasynyń ókili Asqarbek Esjanov oblystaǵy bilim deńgeıi, ata-analarǵa arnalǵan konsýltatıvtik pýnktterdi engizý, balalardy mektepke beıimdeýdiń jalpy baǵdarlamalaryn ázirleý, sondaı-aq ınklıýzıvti bilim berý jáne erekshe bilim berý qajettilikteri bar balalardy qoldaý týraly senatorlarǵa aıtyp berdi. Ol sondaı-aq balalardyń qaýipsizdigin qamtamasyz etý, kámeletke tolmaǵandar arasyndaǵy quqyq buzýshylyqtyń aldyn alý, olardy psıhologııalyq qoldaý jáne qosymsha bilim berý sharalary týraly aıtty.
Depýtattar Mánshúk Mámetova atyndaǵy Qyzylorda pedagogıkalyq joǵary kolledjinde, oblystyq balalar ońaltý ortalyǵynda, «Begim ana» balabaqshasynda boldy. Іs-shara Prezıdenttiń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýyn iske asyrý aıasynda ótti.
