Senatorlar Kereký ustazdarymen rýhanı jańǵyrý baǵdarlamasyn talqylady
ASTANA. QazAqparat - Senattyń Áleýmettik-mádenı damý jáne ǵylym komıtetiniń tóraǵasy Birǵanym Áıtimova bastaǵan Senat depýtattary Pavlodar oblysynda jumys saparymen bolyp, aımaqtaǵy orta bilim berýdiń jaǵdaıymen, salanyń ózekti máselelerimen jáne damý keleshegimen tanysty.
Depýtattar eńbek ujymdarymen, jalpy bilim berý, shaǵyn jabdyqtalǵan jáne arnaýly mektepter men lıtseılerdiń ustazdarymen, ata-analar komıtetteriniń ókilderimen jáne oqýshylarmen kezdesti.
Qazaq tilinde jalpy bilim beretin №25 orta mektepte oblys ortalyǵynyń ustazdar qaýymymen kezdesý boldy. Sharada 12 jyldyq bilim berý baǵdarlamasyn engizý, balalardy úsh tilde oqytý, olardy sapaly oqýlyqtarmen qamtamasyz etý máselelerine erekshe nazar aýdaryldy. Júzdesýde elimizdegi jáne aımaqtaǵy bilim berý júıesiniń aldynda turǵan ózekti máseleler kóterildi. Jergilikti turǵyndar men ustazdar depýtattardan úsh aýysymda oqytý máselelerin sheshýge, alys eldi mekenderde turatyn balalardy mektepke jetkizýdi qamtamasyz etýge yqpal etýdi surady. Shaǵyn jabdyqtalǵan mektepterdiń taǵdyry, ustazdardyń eńbekaqysyn tóleý, «Bilim berý týraly» zańdy iske asyrýǵa baılanysty alańdaýshylyqtaryn jetkizdi. Oqytýshylardyń saýaldaryna bilim jáne ǵylym mınıstriniń orynbasary Elmıra Sýhanberdıeva jaýap berdi.
Sapar barysynda depýtattar aýtıst balalar men aqyl-oı dertine shaldyqqan balalarǵa arnalǵan «Altyn bata» beıimdeý ortalyǵyna da bardy.
17 sáýirde senatorlar Pavlodar memlekettik pedagogıkalyq ınstıtýtynyń jumysymen tanysty. Meımandarǵa ǵylymı-tehnıkalyq jańalyqtar jáne olardyń óndiriske engizilgen nusqalary kórsetildi.
Professorlyq-oqytýshylar quramy aldynda sóılegen senator B.Áıtimova bilim berý men ǵylymdy úılestirgen joǵary oqý oryndary Prezıdent N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵandaı, rýhanı jańǵyrýdyń aldyńǵy shebinde bolýy tıis ekenin atap ótti.
B.Áıtimova, Memleket basshysy alǵa qoıǵan maqsattarǵa qol jetkizý týraly óz oılaryn ortaǵa saldy. Atap aıtqanda, ásirese jastarda ulttyq sana-sezimniń jańa negizderin qalyptastyrý, sondaı-aq qazaq tilin latyn alfavıtine kóshirý, álemniń 100 oqýlyǵyn qazaq tiline aýdarý týraly aıtyldy. Senator rýhanı jańǵyrýdaǵy básekege qabilettilik, pragmatızm, ulttyq biregeılikti saqtaý, bilimniń saltanat qurýy, damýdyń evolıýtsııalyq joly, sana ashyqtyǵy sekildi maqsattarǵa qol jetkizýdiń mańyzyna nazar aýdardy. Sharaǵa qatysýshylar Memleket basshysy belgilegen mejeler barsha halyqtan, eń aldymen bilim berý júıesinen zor kúsh-jigerdi talap etetini týraly ortaq pikirge keldi.
Saparǵa senatorlar Álı Bektaev, Jabal Erǵalıev, Nurlan Qylyshbaev, Tóleýbek Muqashev, Vladımır Redkokashın qatysýda. 18 sáýirde parlamentshiler Aqsý men Ekibastuz qalalarynda, Aqtoǵaı, Qashyr, Lebıaji, Pavlodar, Ýspen, Sharbaqty aýdandarynda ustazdar qaýymymen kezdesedi.
Oblysqa sapardyń qorytyndylary Senattyń Áleýmettik-mádenı damý jáne ǵylym komıtetiniń 19 sáýirde Pavlodarda ótetin kóshpeli otyrysynda qaralatyn boldy.
