Senatorlar Qazaqstan men Reseı arasyndaǵy dostyq týraly shartqa engizilgen ózgeristerdi talqylady
ASTANA. 11 maýsym. QazAqparat - Búgin Qazaqstan Respýblıkasy Parlamenti Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy bolyp ótti.
Onda depýtattar Qazaqstan Respýblıkasy men Reseı Federatsııasy arasyndaǵy dostyq,yntymaqtastyq jáne ózara kómek týraly shartqa ózgerister engizý týraly hattamany ratıfıkatsııalaý týraly zań jobasyn talqylady.
Eske salsaq, Hattamaǵa 2012 jylǵy maýsymda Astanada eki Memlekettiń basshylary qol qoıǵan bolatyn. Sharttyń merzimin uzartý qajettiginiń týyndaýy jáne Qazaqstan Respýblıkasy men Reseı Federatsııasy arasyndaǵy yntymaqtastyqtyń óristeı túsýin eskere otyryp, birqatar erejelerdi jetildirýge baǵyttalǵan ózgerister engizilýi jáne jańa aımaqtyq yqpaldastyq birlestikterdiń qurylýy Hattamaǵa qol qoıylýyna negiz boldy.
Hattamada ujymdyq qaýipsizdikke, qorǵanys salasyndaǵy yntymaqtastyqqa, terrorızm, esirtki quraldarynyń, psıhotroptyq zattardyń jáne prekýrsorlardyń zańsyz aınalymy, zańsyz kóshi-qon,adam saýdasy jáne taǵy basqa sol sekildi halyqaralyq sıpattaǵy qylmystarǵa qarsy is-qımylǵa qatysty máseleler boıynsha túzetýler qarastyrylǵan.
