Senatorlar Qazaqstan damý bankiniń qarajaty ne sebepti saýda ortalyǵy qurylysyna jumsalatynyna tańdandy

ASTANA. KAZINFORM – Qazaqstannyń Damý banki jeńildetilgen nesıeni ónerkásip salasyna emes, saýda ortalyǵy men kınoteatr qurylysyna jumsamaq. Osy oraıda bul jaǵdaıdy senator Saǵyndyq Luqpanov synǵa aldy.

«Jekelegen jobalardy qarjylandyrýǵa memlekettiń qatysý boıynsha biraz suraq bar. Máselen, Astana men Mańǵystaýda týrızm salasynda qonaqúıler, saýda jáne oıyn-saýyq ortalyqtary, kınoteatr, bıznes ortalyqtary sııaqty eki jobany júzege asyrý josparlanǵan. Eki jobanyń jalpy quny 331 mlrd teńgeni quraıdy. Eki jobany da qarjylyq qoldaýǵa ınvestor qarajatynyń 40 paıyzy tartylsa, qalǵan 60 paıyzy (bul shamamen 200 mlrd teńge) Qazaqstannyń Damý bankiniń jeńildetilgen qarjylandyrýy arqyly júzege asyrylady. Naqty sektordaǵy birqatar negizgi jobalardy qarjylandyrý máselesi sheshilmeı jatqanda, QDB qarajatyn paıdalana otyryp, mundaı jobalardy júzege asyrýdyń ne qajeti bar?!», - dep surady Saǵyndyq Luqpanov Senatta ótip jatqan óńdeý ónerkásibin damytý taqyrybyndaǵy Parlamenttik tyńdaýda.

Bul turǵyda senator paıyzy tómen nesıelerdi óńdeý ónerkásibindegi el ekonomıkasyna naqty úles qosatyn jáne mýltıplıkatıvtik nátıje beretin jobalarǵa baǵyttaý kerek ekenin qadap aıtty.

Depýtattyń paıymynsha, osy aıtylǵan máseleler buǵan deıingi kóptegen baǵdarlamalar aıasyndaǵy iri jobalardy júzege asyrý kezinde oryn alǵan kemshilikterdi qaıtalaýy múmkin.

Buǵan deıin Saǵyndyq Luqpanov elden negizgi shıkizat eksporttalyp, Qazaqstanǵa qosylǵan quny bar taýarlar ımporttalyp jatqanyn synǵa alǵan edi.