Senatorlar qaza tapqan ormanshylardy bir mınýt únsizdikpen eske aldy

ASTANA. QazAqparat - Máýlen Áshimbaevtiń tóraǵalyǵymen ótken Senat bıýrosynyń otyrysynda depýtattar 15 maýsymda bolatyn palata otyrysynyń kún tártibin bekitti, dep habarlaıdy QazAqparat.

Bıýro otyrysy Abaı oblysyndaǵy alapat órttiń saldarynan qaza tapqan ormanshylardy bir mınýt únsizdikpen eske alýmen bastaldy.

Senat tóraǵasy Memleket basshysynyń ókimimen 12 maýsymda elimizde jalpyulttyq aza tutý jarııalanǵanyna nazar aýdaryp, qaıtys bolǵandardyń otbasylary men jaqyndaryna kóńil aıtty. Máýlen Áshimbaev keshe el Prezıdenti atalǵan óńirge arnaıy baryp, qaza tapqandardyń otbasy múshelerimen kezdeskenin jáne olarǵa kómek kórsetý, órttiń shyǵý sebepterin anyqtaý týraly tıisti organdarǵa naqty tapsyrmalar bergenin de atap ótti.

Sonymen qatar bıýro otyrysynda alda bolatyn Úkimet saǵatynyń taqyryby talqylandy. Máýlen Áshimbaev kóteriletin máseleniń mańyzdy ekenin aıta kelip, elimizde agroónerkásip keshenin damytýǵa qatysty naqty usynystar ázirleý kerektigin tilge tıek etti.

Aıta keteıik, 16 maýsym kúni «Agroónerkásip kesheniniń eksporttyq áleýetin arttyrý jáne ımportty almastyrý jaǵdaıynda aýyl sharýashylyǵy ónimin qaıta óńdeý máseleleri» taqyrybyna arnalǵan Úkimet saǵatyn ótkizý josparlanyp otyr.

Odan bólek, senatorlar aldaǵy Palata otyrysynyń kún tártibin bekitti. Soǵan sáıkes, depýtattar beısenbi kúni Úkimettiń jáne Joǵary aýdıtorlyq palatanyń 2022 jylǵy respýblıkalyq bıýdjettiń atqarylýy týraly esepterin qaraıdy.