Senatorlar qaza tapqan kenshilerdi bir mınýt únsizdikpen eske aldy
Senat spıkeri Máýlen Áshimbaevtyń tóraǵalyǵymen palata bıýrosynyń otyrysy ótti. Onda depýtattar 2 qarasha kúni ótetin Senat otyrysynyń kún tártibin bekitti, dep habarlaıdy Kazinform.
Bıýro otyrysy bir mınýt únsizdikpen bastalyp, senatorlar men Apparat qyzmetkerleri Qaraǵandy oblysynda bolǵan tótenshe jaǵdaı saldarynan qaza tapqan kenshilerdi eske aldy.
Máýlen Áshimbaev qaza tapqandardyń otbasylary men jaqyndaryna kóńil aıtty.
Sondaı-aq Senat tóraǵasy Memleket basshysy apattyń mán-jaıyn anyqtap, tıisti sheshim qabyldaý úshin oqıǵa ornyna arnaıy barǵanyn atap ótti.
El Prezıdenti kenshilerdiń otbasylarymen jáne jaqyndarymen kezdesip, olarǵa qoldaý kórsetip, apattyń sebebin anyqtaý úshin tıisti organdarǵa naqty tapsyrmalar berdi.
Aldaǵy palata otyrysynda senatorlar «Astanada (Qazaqstan Respýblıkasy) Dúnıejúzilik densaýlyq saqtaý uıymynyń Eýropalyq óńirlik komıtetiniń jetpis úshinshi sessııasyn uıymdastyrý týraly Qazaqstan Respýblıkasynyń Úkimeti men Dúnıejúzilik densaýlyq saqtaý uıymy arasyndaǵy kelisimdi ratıfıkatsııalaý týraly» zańdy qaraıdy.
Bul zań Qazaqstan men Dúnıejúzilik densaýlyq saqtaý uıymy arasyndaǵy halyqaralyq yntymaqtastyqty odan ári damytýdy kózdeıdi.
Zańdy ratıfıkatsııalaý uıymǵa múshe memleketter arasynda Qazaqstannyń bedelin nyǵaıtýǵa jáne bizdiń elge degen senimdi arttyrýǵa yqpal etpek.
Sondaı-aq Senat tóraǵasy aldaǵy palata otyrysynda Memleket basshysynyń bıylǵy Joldaýy aıasynda qolǵa alynatyn ulttyq jobalardy iske asyrýǵa jáne elimizdiń úsh jyldyq bıýdjetine qatysty máseleler talqylanatynyn atap ótti.
