Senatorlar Qapshaǵaı qalasynda birqatar kezdesýler ótkizdi
ASTANA. QazAqparat - Senat depýtattary aımaqtardyń áleýmettik-ekonomıkalyq damý barysymen tanysýda.
Almaty oblysynda saparda júrgen senatorlar Nurlan Qylyshbaev pen Ańsar Musahanov Qapshaǵaı qalasynda, Sheńgeldi jáne Zarechnyı aýyldyq okrýgtarynda birqatar kezdesýler ótkizdi. Depýtattar «Agrıpak» oraý ónimderin óndiretin tsehynda, «Raýan» sharýa qojalyǵynda, «Balyq óndirisi», «Grın Lend Alataý», «Mareven Fýd Tıan-Shan» mekemelerinde boldy. Sondaı-aq «Nurly jol» baǵdarlamasy boıynsha Zarechnyı aýyldyq ákimdiginde salynǵan bý qazandyǵynyń jumysymen tanysty.
Senatorlar Balqash aýdanynda «Dinara-Ranch» jáne «ÓtesBıoAzııa» agrofırmalarynyń eńbek ujymdarymen, sonymen qatar aýdandyq qoǵamdyq keńes pen jergilikti polıtsııa basshylyǵymen kezdesti.
Júzdesý barysynda N. Qylyshbaev pen A. Musahanov bes ınstıtýttyq reformalar men «100 naqty qadam» Ult josparyn iske asyrýǵa arnalyp Parlamentte qabyldanǵan zańdar týraly saılaýshylardy habardar etti.
