Senatorlar ishki ister organdaryn reformalaýdyń 3 negizgi baǵytyn atady
ALMATY. QazAqparat - Almaty qalasy Іshki ister departamenti basshylyǵynyń májilis zalynda Parlament Senatynyń depýtattarymen kezdesý ótti. Onda Elbasy tapsyrmasyna oraı quqyq qorǵaý organdaryna júktelgen mindetter týraly sóz boldy, dep habarlaıdy QazAqparat tilshisi.
Polıtseıler aldynda sot júıesi men quqyq qorǵaý organdarynyń konstıtýtsııalyq zańnama komıtetiniń hatshysy Dýlat Qusdáýletov, Halyqaralyq qatynastar, qorǵanys jáne qaýipsizdik komıtetiniń hatshysy Tóleýbek Muqashev jáne Áleýmettik-mádenı damý jáne ǵylym komıtetiniń múshesi Dınar Núketaeva sóz sóıledi.
«Azamattardyń qaýipsizdigi ómir sapasynyń ajyramas bóligi bolyp tabylady. Іshki ister organdarynyń qyzmetkerleri óz ómirlerin qaterge tigip, qylmystarmen kúresedi. Sonymen birge, qoǵam quqyq qorǵaý organdarynyń, birinshi kezekte polıtsııa jumysynyń túbegeıli jaqsarǵanyn kútedi. Memleket basshysy Úkimetke Prezıdent Ákimshiligimen birge «Іshki ister organdaryn jańǵyrtý jol kartasyn» qabyldaýdy tapsyrdy. Bul reforma 2019 jyldyń 1 qańtarynan bastalýy kerek», - dedi Dýlat Qusdáýletov.
Senat depýtattary ishki ister organdaryn reformalaýdyń 3 negizgi baǵytyn atap ótti.
«Birinshiden, polıtsııanyń tıimsiz fýnktsııalaryn alyp tastaý maqsatynda ІІM-niń shtattaǵy qyzmetkerleri ońtaılandyrylady. Ekinshiden, polıtseıdiń jańa standartyna sáıkes, mansaptyq ósý júıesi, sondaı-aq polıtsııa akademııalary arqyly kadrlardy daıyndaý jáne irikteý júıesi ózgertiledi. Úshinshiden, halyqpen jumys jasaýdyń qazirgi zamanǵy jańa formatyn engizý jáne polıtsııany baǵalaý krıterııleriniń túbegeıli ózgerýi josparlanýda», - dedi Senat depýtaty Tileýbek Muqashev.
«Elbasynyń aıtýynsha, polıtsııanyń jumysy qyzmettik úlgige aýysý kerek, ıaǵnı qalalyq jáne aýdandyq polıtsııa bólimderinde HQKO bazasyndaǵydaı azamattardy qabyldaý úshin qolaıly jaǵdaılar jasalatyn bolady. Qazaqstannyń barlyq qalalary qoǵamdyq qaýipsizdikti baqylaý júıelerimen tsıfrlanady. Polıtsııanyń jumysyn baǵalaý ólshemi - halyqtyń senimdiligi men halyq arasyndaǵy qaýipsizdik sezimi bolýy tıis», - dedi depýtat Dınar Núketaeva.
Basqosý barysynda polıtsııa basshylyǵy óndiristegi jańa zańdardyń qoldanylýyna qatysty suraqtar qoıdy jáne bolashaqta Qazaqstan Respýblıkasynyń ishki ister organdaryn reformalaý máselelerin talqylady.
