Senatorlar halyqtyń talap-tilekterin tyńdaý úshin óńirlerge saparlaıdy

NUR-SULTAN. QazAqparat – Senat tóraǵasy Máýlen Áshimbaev palata depýtattary óńirlerge saparlaǵan kezde qandaı máselege den qoıý kerek ekenin aıtty, dep habarlaıdy QazAqparat tilshisi.

«Senatorlar erteńnen bastap óńirlerge baryp, halyqpen kezdesip, azamattardyń talap-tilekterin tyńdaıdy. Sol kezde Joldaýda aıtylǵan basymdyqtardyń jáne qabyldanatyn zańdardyń mańyzyn, olardyń naqty paıdasyn azamattarǵa tolyqqandy jetkizesizder dep oılamyn. Sapar barysynda óńirlerdegi ózekti máselelerge basa mán berip, eldiń pikiri men usynystaryna basa nazar aýdarǵa abzal. Eń bastysy, azmattar óz sózderiniń bılikke jetip jatqanyn, jańa Joldaý sonyń jarqyn kórinisi ekenin sezinýi kerek. Aldaǵy saparlaryńyzda sizderge sáttilik tileımin», - M. Áshimbaev Senattyń jalpy otyrysynda.

Budan buryn habarlanǵandaı, Senat tóraǵasy Prezıdent Joldaýy aıasynda Parlamentke úlken mindet pen jaýapkershilik júktelip otyrǵanyn aıtty.

«Prezıdentimiz zańdardyń qabyldaný tártibine qatysty da tyń normalar usyndy. Olar elimizdiń qazirgi damýyndaǵy úrdister men talaptarǵa tolyǵymen saı keledi. Munyń bári – eń joǵarǵy ókildi organ jumysynyń tıimdiligin arttyrý úshin jasalyp otyrǵan qadamdar. Osylaısha, Memleket basshysy Parlamenttiń, onyń ishinde Senattyń jumysyna qatysty qoǵamdaǵy túrli pikirtalasqa birjola núkte qoıdy . Parlamenttiń respýblıkalyq bıýdjettiń sapaly oryndalýyna baqylaýdy kúsheıtý máselesi de nazardan tys qalǵan joq», - dedi M. Áshimbaev.