Senatorlar Eýropa Keńesiniń Parlamenttik Assambleıasy jumysyna qatysty
ASTANA. KAZINFORM - QR Parlamenti Senatynyń depýtattary Olga Perepechına men Janna Asanova Eýropa Keńesi Parlamenttik Assambleıasynyń kóktemgi sessııasyna qatysty.
Senatorlar EKPA Tóraǵasy Teodoros Rýsopýlospen kezdesti. Júzdesýge qatysýshylar Qazaqstannyń Eýropa Keńesimen jáne Parlamenttik Assambleıamen áriptestik qatynastaryn damytýdy, sondaı-aq adam quqyqtaryn qorǵaý, demokratııa, zań ústemdigi máselelerin talqylady.
Senat Tóraǵasynyń orynbasary, Qazaqstannyń EKPA-daǵy parlamenttik delegatsııasynyń basshysy Olga Perepechına Qazaqstan Parlamenti men EKPA arasyndaǵy yntymaqtastyq týraly kelisimge qol qoıylǵan sátten bastap 20 jylda ózara is-qımyl tolyq ózara túsinistik aıasynda damyp kele jatqanyn atap ótti.
Ol Parlamenttik Assambleıanyń basshysyn elimizdegi ádiletti Qazaqstan qurýǵa oraı júrgizilip jatqan aýqymdy saıası jáne demokratııalyq ózgeristermen tanystyrdy.
Teodoros Rýsopýlos Qazaqstanǵa demokratııalyq memleket qurýǵa jan-jaqty járdem berýdi jalǵastyrýǵa, QR Parlamentimen turaqty baılanysta bolýǵa jáne óz mandaty boıynsha elimizge barý múmkindigin qarastyrýǵa daıyn ekenin bildirdi.
Ulttyq delegatsııalardyń basshylary – depýtattar Jolt Nemet (Majarstan), Kımmo Kılıýnen (Fınlıandııa), Bertran Býı (Frantsııa), Rýben Rýbınıan (Armenııa), Elızabetta Gardını, (Italııa), Emanýelıs Zıngerıs (Lıtva) - qazaqstandyq parlamentshilermen baılanystardy jandandyrýdy jáne parlamentaralyq dıplomatııany nyǵaıtýdy jaqtady.
Olar Qazaqstandaǵy konstıtýtsııalyq ózgerister, ólim jazasyn joıý, Parlamenttegi áıelder sanyn kóbeıtý, Adam quqyqtary jónindegi ýákil ınstıtýtyn kúsheıtýmen qosa elimizdiń demokratııalyq baǵytyna qoldaý bildirdi.
Qazaqstandyq senatorlar sapar barysynda eýropalyq konservatorlar men Demokratııalyq alıans toptarynyń, sondaı-aq Birikken eýropalyq solshyldardyń otyrystarynda sóz sóıledi.
Depýtattar 18 sáýirde Eýropa Keńesiniń shtab-páterinde Yntymaqtastyq týraly kelisimge qol qoıylýynyń 20 jyldyǵyna arnalǵan «Qazaqstan men EKPA arasyndaǵy yntymaqtastyq tájirıbesi men bolashaǵy» taqyrybyndaǵy jarnama saıt sharasyna qatysty.
Eýropa Keńesiniń parlamentshileri kóktemgi sessııa aıasynda «Qazaqstannyń Adam quqyqtary, demokratııa jáne Eýropa Keńesimen yntymaqtastyq salasyndaǵy ilgerileýi» atty jazbasha deklaratsııa qabyldady. Onda ádiletti jańa Qazaqstandy qurýdyń ajyramas bóligi retinde demokratııalyq jáne saıası reformalardy iske asyrýdaǵy elimizdiń eleýli jetistikteri atap ótildi.
