Senatorlar: Elimizdi odan ári damytý úshin turaqtylyq kerek
NUR-SULTAN. QazAqparat - Bul kúnderi elimizde bolyp jatqan oqıǵalar barsha qazaqstandyqtardy tolǵandyryp otyr. Senat depýtattary osyǵan baılanysty arandatýǵa urynbaı aqylmen sheshim qabyldaý týraly Prezıdenttiń úndeýine qoldaý bildirdi, dep habarlaıdy QazAqparat.
Senat Tóraǵasy Máýlen Áshimbaev budan bylaıǵy damý úshin turaqtylyq pen tynyshtyqty saqtaý ustanymy asa mańyzdy ekenin aıtty.
«Prezıdentimiz aıtqandaı, dál qazir bizge ózara senim men dıalog kerek. Azamattardyń qaýipsizdigin jáne qoǵamdyq qaýipsizdikti qamtamasyz etý úshin Memleket basshysynyń Jarlyǵymen Almaty qalasy men Mańǵystaý oblysynda tótenshe jaǵdaı engizilgeni belgili. Prezıdentimiz qabyldaǵan bul shuǵyl sharalar elimizdiń turaqtylyǵyn nyǵaıtýdy kózdeıdi. Sondyqtan dál qazir bizder úshin Memleket basshysynyń sheshimderine qoldaý bildirip, eldiń bereke-birligin bekemdeı túsý asa mańyzdy», - dedi Senat Tóraǵasy.
Nurtóre Júsip bolyp jatqan jaǵdaı týraly aıta kelip, baǵanyń ósýi men turaqsyzdyǵy halyqtyń yzasyn týǵyzǵanyn jáne elimizdiń Prezıdenti eldegi áleýmettik-ekonomıkalyq jaǵdaı týraly keńeste ol máselelerdi sheshý maqsatynda tıisti tapsyrmalar bergenin atap ótti.
«El sabyrǵa boı aldyryp, máseleniń zań aıasynda sheshilgeni abzal. Halyqtyń tolqýy ınflıatsııanyń órshýimen baılanysty. Jáne buǵan Úkimettiń kinási bar ekendigin Prezıdent ashyp aıtty. Oǵan eldegi baǵa turaqsyzdyǵyn qosyńyz. Halyq tarapynan áleýmettik-ekonomıkalyq talaptardyń qoıylýy máseleniń shıelenisip ketkendigin kórsetedi. Sondyqtan endi jasaqtalatyn Úkimettiń aldynda eldiń áleýmettik jaǵdaıyn retteý mindeti tur», - dedi halyq qalaýlysy.
Senator Aqylbek Kúrishbaev óz kezeginde qazirgi kezde árbir qazaqstandyq bizdiń elimizdiń taǵdyryna jaýapkershilik arqalap otyrǵanyn atap ótti.
«Bizdiń qoǵamda ádiletti kóterilip otyrǵan birqatar máselelerdi Úkimettiń ýaqtyly sharalar qabyldaýy arqyly óz kezinde sheshýge bolatyn edi dep esepteımin. Olardyń kóbi qazir Prezıdenttiń jeke aralasýynan keıin ǵana sheshimin taýyp jatyr. Qasym-Jomart Toqaev óz sózinde halyqty áleýmettik qoldaýdyń basymdyqtaryn naqty belgilep berdi jáne olar oryndalady! Elimizdiń bolashaǵy árqaısymyzǵa baılanysty», - dedi Senat depýtaty.
Senatorlar bul kúnderi elimizdiń aımaqtarynda júr jáne olar azamattarmen kezdesýler ótkizýde.
Senat depýtattary dástúrli saparlarynda eń shalǵaı aýyldarǵa baryp, turǵyndarmen ózekti máselelerdi talqyǵa salatyn bolady. Olar mańyzdy máselelerdi sheshý joldaryn qarastyryp, memlekettik organdarǵa depýtattyq saýaldar joldaıdy nemese zańnamaǵa tıisti ózgerister engizý úshin bastama kóteretin bolady.
