Senatorlar elimizdegi bilim berý salasyndaǵy qalyptasqan jaǵdaıdy zerdeledi
ASTANA. QazAqparat - Áleýmettik-mádenı damý jáne ǵylym komıtetiniń tóraǵasy Birǵanym Áıtimova bastaǵan Senat depýtattary Vıacheslav orta mektebi jáne «Arnasaı» jasyl tehnologııa ortalyǵynyń jumysymen tanysty, dep habarlaıdy QR Parlamenti senatynyń baspasóz qyzmeti.
Memlekettik organdardyń, «Jasyl ekonomıkaǵa jáne G-globaldy damytýǵa arnalǵan koalıtsııa» zańdy tulǵalar birlestigi basshylyǵymen jáne «Arnasaı» jasyl tehnologııalar ortalyǵy qyzmetkerlerimen kezdesýinde B.Áıtimova Qazaqstan Respýblıkasynyń Prezıdenti N.Nazarbaev jarııa etken «5 ınstıtýttyq reformany iske asyrý jónindegi 100 naqty qadam» Ult josparyn oryndaý jónindegi Parlamenttiń qyzmeti týraly áńgimeledi. Senat komıtetiniń basshysy Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýynyń basymdyqtaryn zańnamalyq turǵyda qamtamasyz etýge nazar aýdardy.
Senatorlar jańa tehnologııalar qoldanylatyn Ortalyqtyń qyzmetimen tanysty, damý keleshegi belgilendi. Komıtet tóraǵasy B.Áıtimova bul keshen Qazaqstan Prezıdentiniń Joldaýyndaǵy tórtinshi basymdyǵy - adam kapıtaly turǵysynda da, «ESKPO-2017» kórmesiniń maqsattaryn iske asyrý turyǵysynan da tartymdy ekenin atap ótti.
Búginde memlekettik organdardyń, «G-global» halyqaralyq hatshylyǵynyń, BUU Qazaqstandaǵy Damý baǵdarlamasynyń jáne basqalardyń qoldaýymen qurylǵan jasyl ekonomıkaǵa kóshý jónindegi tujyrymdamany iske asyrýǵa baılanysty 25 joba júzege asty. Eldegi túrli sanattaǵy turǵyndardy oqytýǵa, shaǵyn jáne orta bıznes sýbektileriniń, sondaı-aq jergilikti atqarýshy organdardyń «jasyl» tehnologııany is júzinde paıdalaný jóninde júıeli bilim alýǵa múmkindik týyp otyr. Odan basqa, Ortalyq jospary boıynsha bul jobalar «EXPO-camp» ortalyǵynyń jazǵy lageri jumysynyń aıasynda «EKSPO-2017» halyqaralyq kórmesi meımandarynyń nazaryna usynylady.
Vıacheslav orta mektebiniń dırektory Tatıana Nemtsan parlamentshilerdi mektep jumysymen tanystyrdy jáne bul oqý ornynda bıýdjet qarjysyn eleýli túrde únemdeýge múmkindik beretin jasyl tehnologııalardy engizýdegi negizgi kórsetkishter týraly áńgimelep, qazirgi ózekti máselelerdi aıtyp berdi.
Kezdesý barysynda otandyq bilim berýdiń qazirgi jaǵdaıy, ózekti máseleleri men keleshektegi damýy týraly múddelilik turǵysynda talqylaý boldy.
Komıtet tóraǵasy B. Áıtimova júzdesýdi qorytyndylaı kelip, oqý ornyndaǵy jańalyqtarmen senatorlardyń tanysýymen qatar tutastaı salanyń jaǵdaıynan habardar bolǵanyn atap ótti. Aıtylǵan usynystar bizdiń elimizdegi bilim berý jáne ǵylym salasyndaǵy zańnamany qalyptastyrý barysynda eskeriletini aıtyldy. Sharaǵa Áleýmettik-mádenı damý jáne ǵylym komıtetiniń músheleri Aqan Bıjanov, Álı Bektaev, Nurlan Qylyshbaev jáne Tóleýbek Muqashev qatysty.
Bul sapar Qazaqstan Prezıdentiniń Joldaýyn iske asyrý jáne «Orta bilim berý júıesin zańnamalyq retteýdiń jaǵdaıy, problemalary jáne keleshegi» taqyrybyna arnalǵan parlamenttik tyńdaýǵa ázirlik aıasynda júzege asty.
