Senatorlar ekinshi sessııada 200-ge jýyq depýtattyq saýal joldady
ASTANA. KAZINFORM – Senatorlar ekinshi sessııa kezinde 200-ge jýyq depýtattyq saýal joldady. Bul týraly Senat tóraǵasy Máýlen Áshimbaev aıtty.
«Sessııa barysynda basqa baǵyttar boıynsha da aýqymdy jumys atqaryldy. Memleket basshysynyń tapsyrmasymen qurylǵan Ornyqty damýy salasyndaǵy ulttyq maqsat-mindetterdiń iske asyrylýyna monıtorıng júrgizý jónindegi Parlamenttik komıssııa belsendi jumys istep keledi. Depýtattyq korpýs jergilikti ókildi jáne atqarýshy organdarmen tyǵyz baılanys ornatyp, birlesip jumys atqarýda. Osy rette Prezıdent tapsyrmasymen qurylǵan «Bir el – bir múdde» depýtattyq tobynyń ulttyq birlikti nyǵaıtýǵa arnalǵan qyzmetin de atap ótken jón. Senat janynan arnaıy qurylǵan Inklıýzııa jónindegi keńes múmkindigi shekteýli azamattardy medıtsınalyq, eńbek jáne áleýmettik ońaltýǵa basa mán berip otyr», - dedi Senat tóraǵasy.
Máýlen Áshimbaev Senattyń Jobalyq keńsesi, Máslıhattarmen ózara is-qımyl jónindegi keńes, «Óńir» depýtattyq toby da josparly jumys júrgizip kele jatqanyn aıtty.
«Senatta azamattyq qorǵaýdy jetildirý jáne ekonomıkanyń óńdeýshi sektoryn damytý máselelerine arnalǵan parlamenttik tyńdaýlar ótkizildi. Budan bólek, turaqty komıtetter ótkizgen 4 úkimet saǵaty, 50-ge jýyq kóshpeli otyrys, 100-den asa dóńgelek ústel men kezdesýler bar. Sonyń aıasynda Prezıdent tapsyrmalarynyń, zańdardyń jáne memlekettik baǵdarlamalardyń oryndalý barysy jan-jaqty talqylandy. Osy is-sharalarda qabyldanǵan usynymdar Úkimetke jáne jaýapty memlekettik organdarǵa jiberildi. Onyń bári Senattyń baqylaýynda bolady. Osy sessııada áriptesterimiz 200-ge jýyq depýtattyq saýal joldap, ózekti máselelerdi sheshý joldaryn usyndy», - dedi ol.
Palata spıkeri 28 maýsymda Parlament palatalarynyń birlesken otyrys ótetinin eske saldy.
«Onda ekinshi sessııanyń jumysyna qorytyndy jasalady. Jańa sessııaǵa deıin óńirlerge baryp, jurtshylyqpen kezdesemiz. Jergilikti jerdegi problemalardy zerdelep, halyqty alańdatatyn máseleler men olardyń usynystaryna mán beremiz. Onyń barlyǵy aldaǵy depýtattyq qyzmetimizge negiz bolady», - dedi Máýlen Áshimbaev.
