Senatorlar Ekibastuzda ótken keńeste qonys aýdarý máselelerin talqylady

EKІBASTUZ. QazAqparat – «Óńir» depýtattyq toby músheleriniń aımaqtarǵa sapary odan ári jalǵasty. Bul shara azamattardy jumys kúshi artyq óńirlerden jumys kúshine zárý óńirlerge qonystandyrý máselesi boıynsha otyrysqa daıyndyq aıasynda qolǵa alynǵan bolatyn. Senatorlar Erik Sultanov, Álimjan Qurtaev jáne Altynbek Nuhuly búgin Pavlodar oblysyndaǵy Ekibastuz qalasynda boldy, dep habarlaıdy QazAqparat QR Parlamenti Senatynyń baspasóz qyzmetine silteme jasap.

Depýtattar sapar barysynda qonys aýdarýshylarǵa arnalǵan úıler salýda áleýetti aýmaq retinde qaralatyn qalanyń shaǵyn aýdandaryn aralady. Sondaı-aq qala aktıviniń qatysýymen qonys aýdarýdy uıymdastyrý máselelerin talqylaý jóninde keńes ótkizildi.

«9 myńǵa jýyq adam qıyndyqtarǵa qaramastan Pavlodar oblysyna kelip otyr. Bul rette qonys aýdarýshylardyń turaqtanýy 97%-dy quraıdy. Bul jergilikti bıliktiń kelgen azamattarǵa qajetti jaǵdaı jasaǵanynyń dáleli bolyp tabylady», - dep atap ótti senator Erik Sultanov.

Senatorlar erikti qonys aýdarý baǵdarlamasyn iske asyrý kezinde óńirler tap bolyp otyrǵan problemalarǵa erekshe nazar aýdardy.

«Biz búgin qonys aýdarý jónindegi kvotany jylyna 2 myńnan 10 myń otbasyna deıin ulǵaıtý múmkindigin talqylaımyz. Onda da beıimdelý jaı-kúıin jeńildetý úshin bir eldi mekenge 5-20 otbasyn toptap kóshirý arqyly júzege asatyn bolady», - dedi Álimjan Qurtaev.

Jıyn barysynda Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov qandastardy elimizdiń ońtústiginen soltústikke kóshirý jónindegi «Asar» pılottyq jobasyn óńir aktıvine tanystyrdy.

Senatorlar sonymen qatar Memleket basshysynyń monoqalalardy damytý jónindegi tapsyrmalaryn iske asyrý barysymen de tanysty. Keńes barysynda Senat depýtattaryna Ekibastuz qalasyn damytýdyń 2025 jylǵa deıingi keshendi jospary tanystyryldy.