Senatorlar «Densaýlyq» jańa memlekettik baǵdarlamasymen tanysty
Densaýlyq saqtaý jáne áleýmettik damý mınıstriniń aıtýynsha, jańa qujat buǵan deıingi eki memelkettik baǵdarlamanyń qısyndy jalǵasy bolyp tabylady. Atap aıtqanda, 2005-2009 jyldarǵa arnalǵan baǵdarlama negizinen densaýlyq saqtaý júıesiniń ınfraqurylymyn damytýdy, kadrlar biliktiligin arttyrýdy qarastyrsa, 2011-2015 jyldarǵa arnalǵan «Salamatty Qazaqstan» memlekettik baǵdarlamasynda densaýlyq saqtaý júıesi qyzmetiniń naryqtyq tetikter negizi qalandy.
Mınıstrdiń sózine qaraǵanda, buǵan deıingi kezeńderde densaýlyq saqtaý salasynda birshama jetistikterge qol jetti. Atap aıtqanda, halyqtyń ómir súrý uzaqtyǵy 71,62 jasqa jetse, halyqtyń jalpy ólim-jitim kórsetkishi 15,3 paıyzǵa tómendegen. Budan bólek, týý kórsetkishi 2,6 paıyzǵa ósse, sábı óliminiń kórsetkishi 1,7 esege tómendegen, al ana ólimi 1,9 esege azaıǵan.
«Al jańa «Densaýlyq» memlekettik baǵdarlamasy boıynsha azamattar densaýlyǵyn saqtaýǵa qatysty memlekettiń, jumys berýshi men jumysshynyń arasyndaǵy yntymaqty jaýapkershilik qaǵıdaty engiziledi. Mundaı prıntsp Ekonomıkalyq damý jáne yntymaqtastyq uıymyna múshe memleketterdiń basym bóliginde qamtylǵan. Sondyqtan da, biz jańa baǵdarlama aıasynda Elbasynyń tapsyrmasyna sáıkes, atalǵan elderdiń standarttaryn satylap engizetin bolamyz», - dedi mınıstr T. Dúısenova.
Onyń aıtýynsha, jańa baǵdarlama boıynsha aldaǵy 4 jyl ishinde densaýlyq saqtaý salasynda birqatar strategııalyq maqsattar belgilenip otyr. Atap aıtqanda, 2020 jylǵa qaraı kútiletin ómir súrý uzaqtyǵyn 73 jasqa deıin ulǵaıtý, medıtsınalyq qyzmetterdiń sapasy men qoljetimdiligin arttyrý, densaýlyq saqtaý salasyndaǵy basqarý men qarjylandyrý júıesin jetildirý mejelenip otyr.