Senatorlar densaýlyq saqtaýǵa qatysty máselelerdi baqylaýda ustap otyr - Asqar Shákirov
NUR-SULTAN. QazAqparat - Búgin Parlament Senaty Halyqaralyq qatynastar, qorǵanys jáne qaýipsizdik komıtetiniń depýtattary koronavırýs pandemııasy kezinde halyqty dári-dármekpen qamtamasyz etý jáne gýmanıtarlyq kómekti bólip, taratý máselesi boıynsha densaýlyq saqtaý, syrtqy ister, qarjy mınıstrlikteriniń jáne taǵy basqa múddeli vedomstvolardyń basshylarymen vıdeo-konferentsııa formatynda kezdesý ótkizdi, dep habarlaıdy QazAqparat tilshisi.
Memleket basshysy Qasym-Jomart Toqaev 10 shildede ótken Úkimettiń keńeıtilgen otyrysynda indettiń Qazaqstanǵa tıgizgen zardabynyń sebepterine toqtalyp, onyń aldyn alýdyń naqty sharalaryn anyqtap bergen bolatyn.
Іs-sharaǵa qatysqan Senat tóraǵasynyń orynbasary Asqar Shákirov qazirgi tańda depýtattar jumystaryn óńirlerde jalǵastyryp jatqanyn, bul óz kezeginde elimizde qalyptasqan ahýaldy naqty baǵalaýǵa múmkindik beretinin aıtty.
«Senat depýtattary densaýlyq saqtaýǵa qatysty máselelerdi baqylaýda ustap otyr jáne árdaıym qajetti kómek kórsetýge daıyn. Azamattardyń ómirine qaýip tóndirgen aýyr jaǵdaıdan keıin de bir aı ýaqyt ótti. Endi qaıtyp ondaı olqylyqtarǵa jol berýge bolmaıdy», – dedi Senattyń vıtse-spıkeri Asqar Shákirov.
Sonymen qatar, kezdesýde shet memleketterden kelgen gýmanıtarlyq kómekti qabyldaý, bólý jáne qajettilikke qaraı olardyń quramy keńinen talqylandy. Bul másele boıynsha elimizdiń Syrtqy ister mınıstrligimen úılesimdi jumys isteý usynyldy. Depýtattardyń óńirlerdegi saparlary jalǵasyp jatqany eskerilip, qatysýshylar aldaǵy ýaqytta birlese jumys isteý jóninde ortaq mámilege keldi.
