Senatorlar tsıfrlandyrýdyń problemalary men kemshilikterin aıtty
Senat baspasóz qyzmetiniń málimitenshe, atalǵan şarada eldegi tsıfrlandyrýdyń qazirgi jaǵdaıy, ınternetpen qamtamasyz etý jáne aımaqtardaǵy aqparattyq qaýipsizdik máseleleri talqylandy
«Memleket basshysy bıylǵy 10 shildede ótken Úkimettiń keńeıtilgen otyrysynda pandemııa tsıfrlyq ekonomıka salasyndaǵy eleýli kemshilikter men olqylyqtardy anyqtaǵanyn atap ótti. Osyǵan baılanysty indet jaǵdaıynda tsıfrlandyrýdy damytýdaǵy kemshilikterdi eskere otyryp, memlekettik organdardyń jumysyndaǵy tásilderdi qaıta qaraý qajet dep sanaımyz», – dedi Senat tóraǵasynyń orynbasary Nurlan Ábdirov.
Vıtse-spıker qazirgi ýaqytta ADSL tehnologııasy boıynsha 118 qala men 4558 aýyldyq eldi meken ınternetpen qamtamasyz etilgenin aıtty. Ony ári qaraı damytý boıynsha jumystar júrgizilýde. Qazirgi tańda Qazaqstan halqynyń shamamen 40 paıyzy aýyldyq aımaqta turady. Búginde baılanys operatorlary qala men aýyl arasyndaǵy tsıfrlyq alshaqtyqty joıýǵa baǵyttalǵan jelilik qurylys jobasyn júzege asyrýda.
«Qazaqstanda derbes derekterdiń qaýipsizdigin qamtamasyz etý servısi ázirlenýde. Bul jeke derekterdiń paıdalanylýyn baqylaýǵa múmkindik beredi. Elimizde sońǵy kezge deıin derbes derekterdi qorǵaý jónindegi ýákiletti organ bolmaǵanyn aıtý kerek. Derbes derekterdi jınaý, óńdeý jáne qorǵaý máseleleriniń barlyǵy operatorlardyń qaraýynda boldy. Bul adam quqyqtaryn qorǵaýmen tyǵyz baılanysty óte ózekti másele. Sondyqtan ony tıisti memlekettik organdar jedel sheshýge tıis dep esepteımiz», – dedi Senat tóraǵasynyń orynbasary.
Sharany Áleýmettik-mádenı damý jáne ǵylym komıtetiniń tóraǵasy Murat Baqtııaruly júrgizip otyrdy.
Úkimet saǵatynda tsıfrlyq damý, ınnovatsııa jáne aeroǵarysh ónerkásibi mınıstri Baǵdat Mýsın sóz sóıledi. Ol memlekettik organdarda taldaý men aqparattyq tehnologııalar arhıtektýrasyna júıeli kózqaras joq ekenin aıtty.
Senat depýtaty Altynbek Nýhuly óz baıandamasynda tsıfrlandyrý salasyndaǵy birneshe ózekti máselelerdi sóz etti. Senator densaýlyq saqtaý, bilim berý jáne jumyspen qamtýdy tsıfrlandyrýdyń basty maqsaty ákimshilik qujat rásimdeý protsesin jeńildetý, azamattarymyzǵa kórsetiletin kómektiń ashyqtyǵy men qol jetimdiligin qamtamasyz etý qajettiligine toqtaldy.
«Áleýmettik qyzmetterdiń portaly» avtomattandyrylǵan aqparattyq júıesin engizý azamattardyń qajettilikteri úshin mańyzdy ról atqaratynyn atap ótkim keledi», – dedi Altynbek Nýhuly.
Mańyzdy taqyrypty talqylaýǵa Senattyń Jas sarapshylar klýbynyń músheleri de qatysty. Olar tsıfrlandyrýdyń durys jumysyna qatysty oı qosyp, usynystarymen bólisti.
Úkimet saǵatynyń qorytyndysy boıynsha usynymdar men usynystar qabyldandy. Olar, óz kezeginde Qazaqstan Respýblıkasynyń múddeli memlekettik organdaryna joldanady, sondaı-aq, zań jobalaryn qaraý barysynda jáne Komıtettiń jumysynda eskeriledi.
Úkimet saǵatyn Áleýmettik-mádenı damý jáne ǵylym komıteti men Ekonomıkalyq saıasat, ınnovatsııalyq damý jáne kásipkerlik komıteti jáne Halyqaralyq qatynastar, qorǵanys jáne qaýipsizdik komıteti uıymdastyrdy.
