Senatorlar bırja saýdasy men halyqaralyq ekonomıkalyq yntymaqtastyq týraly zańdardy talqylady

ASTANA. KAZINFORM — Búgin Senattyń Ekonomıkalyq saıasat, ınnovatsııalyq damý jáne kásipkerlik jónindegi komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine bırja saýdasy jáne kásipkerlik máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańy qaraldy. Qujat erejeleri bırja saýdasy salasyndaǵy zańnamany jetildirýge jáne ınvestıtsııalyq ahýaldy jaqsartýǵa baǵyttalǵan. Zańda ınvestorlardyń quqyǵyn qorǵaý, taýar bırjasyna memlekettik baqylaýdy keńeıtý jáne ınvestorlar tizilimin jasaqtaý jónindegi ózgerister qamtylǵan.

Komıtet depýtattary «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Iran Islam Respýblıkasy arasyndaǵy erkin saýda týraly kelisimdi ratıfıkatsııalaý týraly» zańdy da talqylady.

Bul zań taýar nomenklatýrasynyń bir bóligine bajdardyń kúshin joıýdy jáne tranzıt jaǵdaıyn jaqsartýdy kózdeıdi. Osy Kelisimdi ratıfıkatsııalaý Iranmen saýda jáne ekonomıkalyq baılanystardy nyǵaıtýǵa jańa múmkindikter ashady.

Sonymen qatar «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Sıngapýr Respýblıkasy arasyndaǵy jan-jaqty ekonomıkalyq yntymaqtastyq týraly negizdemelik kelisimdi jáne Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Sıngapýr Respýblıkasy arasyndaǵy erkin saýda týraly kelisimdi ratıfıkatsııalaý týraly» zań da qaraldy. Bul zań elder arasyndaǵy erkin saýdaǵa jaǵdaı jasaý men saýda kedergilerin joıýdy kózdeıdi.

Otyrys ekonomıkany nyǵaıtý jáne syrtqy saýda men bıznesti damytýǵa jańa múmkindikter jasaýǵa baǵyttalǵan zańnamalyq bastamany ilgeriletýdegi mańyzdy qadam boldy.