Senatorlar bıootyn óndirisin retteýge qatysty qujatty birinshi oqylymda maquldady
áýirdiń 29-y. QazAqparat /Aıdar Ospanalıev/ - Búgin Parlament Senatynyń jalpy otyrysynda depýtattar «Bıootyn óndirisin jáne aınalymyn memlekettik retteý týraly» zań jobasyn birinshi oqylymda maquldap, ony bas komıtetke ekinshi oqylymǵa daıyndaýǵa berdi,
dep habarlaıdy QazAqparat.
Atalmysh qujat bıootyn óndirisi kezinde memlekettiń azyq-túlik qaýipsizdigin qamtamasyz etýge, atmosferaǵa lastaýshy zattardyń shyǵarylý deńgeıin azaıtý jolymen qorshaǵan ortany qorǵaýǵa baǵyttalǵan. Sonymen qatar zań jobasy bıootyn óndirisin damytý salasynda ǵylymı zertteýler júrgizýdi qoldaýǵa jáne bıootyn óndirisi salasyna jańa tehnologııalar engizýdi kózdeıdi. Buǵan qosa zań jobasy úkimetke bıootyn óndirisi boıynsha óndiristik qýattardyń shekti kólemin aıqyndaýǵa múmkindik beretin normalardy engizedi. Zań jobasy qabyldanǵan jaǵdaıda ol áleýmettik jáne ekonomıkalyq salaǵa keri áserin tıgizbeıdi jáne bıootyn óndirisi kezinde týyndaıtyn qoǵamdyq qatynastardy rettep, otyn resýrstarynyń ekologııalyq taza kózderin utymdy paıdalaný úshin qajetti quqyqtyq, ekonomıkalyq, uıymdastyrýshylyq jaǵdaılar jasaıdy.
Otyrysta qujatty jan-jaqty talqylaǵan depýtattardyń pikirleri ekige bólindi. Olardyń biri zań jobasyn qabyldaý qajet dese, ekinshileri oǵan qarsy boldy. Sonymen qatar astyqty otynǵa paıdalaný qajet pe degen másele tóńireginde de pikirtalas týyndady. Osyǵan baılanysty senatorlar qujatty birinshi oqylymda maquldap, ony ekinshi oqylymda qaraý úshin bas komıtetke daıyndaýǵa jiberý qajet dep sheshti.
Depýtattar sonymen qatar otyrysta «Qazaqstan Respýblıkasynyń keıbir zańnamalyq aktilerine bıootyn óndirisin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasyn da birinshi oqylymda maquldap, ony ekinshi oqylymda qaraý úshin bas komıtetke joldady.
