Senatorlar Baıqońyrdan geptılmen zymyran ushyrýǵa tyıym salý máselesin kóterdi
ASTANA. 12 qyrkúıek. QazAqparat - Búgin QR Parlamenti Senatynyń jalpy otyrysynda Murat Baqtııaruly Úkimet basshysynyń atyna saýal joldady.
Onda senator Baıqońyr ǵarysh aılaǵynan geptılmen zymyran ushyrýǵa tyıym salý máselesin taǵy bir márte kóterdi.
Toqtala ketetin jaıt, aǵymdaǵy jylǵy shildeniń 2-sinde Baıqońyr qalasynda Reseıdiń «Proton-M» zymyran tasyǵyshy apatqa ushyrap, oǵan baılanysty Úkimettik komıssııa qurylyp arnaıy jumystardy atqaryp jatqan bolatyn. Degenmen, bir top depýtattar osy óńirde bolyp, halyqpen kezdesýleri barysynda kóterilgen problemalardy Úkimettiń qaperine jetkizýdi jón sanapty.
«Atap aıtqanda, Baıqońyr aılaǵynan adam ómiri men qorshaǵan ortaǵa zor nuqsan keltiretin, tek áskerı maqsatta ǵana qoldanylatyn asa ýly geptıl otynymen ushatyn zymyrandardyń barlyq túrlerine tyıym salatyn, halyqaralyq normalarǵa saı keletin Qazaqstan men Reseıdiń birlesken sheshimderi qabyldanýy kerek. Halyqaralyq normalarǵa sáıkes, Baıqońyr ǵarysh aılaǵyn jalǵa berý kelisimshartyna jergilikti turǵyndardy áleýmettik qorǵaý júıesin engizý qamtamasyz etilýi qajet. Baıqońyrda Reseıdiń ǵana emes, Qazaqstannyń ekologııalyq kodeksi qoldanylýy shart. Budan bólek, Qaraǵandy men Qyzylorda qalalarynda mamandandyrylǵan arnaıy zertteý ortalyqtaryn quryp, apat oryn ala qalǵan jaǵdaıda ony zerttep-taldaýǵa Qazaqstan-Reseı mamandarymen qatar, halyqaralyq sarapshylardy da qatystyrýymyz kerek», - dedi M. Baqtııaruly.
Budan bólek, senator Baıqońyr qalasy men Qarmaqshy aýdany turǵyndarynyń ekologııalyq ústemaqysyn 50 paıyzǵa deıin kóterý jaıyn da alǵa tartty. Onyń aıtýynsha, bul másele Aral óńirindegi ekologııalyq qasiret saldarynan zardap shekken azamattardy áleýmettik qorǵaý týraly zań aıasynda sheshilýi qajet.
