Senatorlar Azyq-túlik korporatsııasyn otandyq óndirýshilerdiń múddesin qorǵaýǵa shaqyrdy
ASTANA. QazAqparat - Búgin Parlament Senatynda Qazaqstannyń eksport saıasatynyń keleshegi men negizgi baǵyttaryna arnalǵan dóńgelek ústelde depýtattar «Azyq-túlik kelisim shart korporatsııasy» AQ-nyń jumysyn synady, dep habarlaıdy QazAqparat.
«Búgingi tańda «Azyq-túlik kelisim shart korporatsııasy» tek bıznes kompanııa bolyp qaldy, ıaǵnı memlekettiń tarapynan olarǵa qoıylatyn úlken talapty oryndap jatyr dep biz aıta almaımyz. Negizinde, olar Qazaqstanda ónim, astyq óndiretinderdiń quqyǵyn qorǵaýy kerek jáne álemdik arenada múddesin qorǵaýy tıis. Osy oraıda otandyq óndirýshilerdiń atynan úlken kólemmen shyǵýy qajet. Alaıda olar ózderi satyp alǵan shaǵyn ǵana ónimmen shyǵyp jatyr. Bul rette korporatsııa ishki astyq kompanııalaryna básekeles bolyp otyr»,-dedi Senattyń Ekonomıkalyq saıasat, ınnovatsııalyq damý jáne kásipkerlik komıtetiniń tóraǵasy Asqar Beısenbaev.
Onyń sózine qaraǵanda, korporatsııa qurylǵan kezde oǵan úlken maqsattar júktelgen, alaıda búginde bıznes qurylym retinde ǵana kórinip otyr.
«Osy oraıda olar ózderiniń bıznes múddesi aıasynan shyǵa almaı júr. Biz Qazaqstannyń bıznes qurylymynyń múddelerin qorǵaıtyn korporatsııany kórgimiz keledi»,-dep túıindedi sózin senator.
