Senatorlar aımaqtardy aralap júr

Qazaqstan Respýblıkasy Parlamenti Senatynyń depýtaty Sergeı Ershov jumys babyndaǵy saparmen Qaraǵandy oblysynyń Jezqazǵan jáne Sátbaev qalalarynda bolyp, oblystyq jáne qalalyq máslıhat depýtattarymen kezdesti. Senator kezdesý barysynda Parlament qabyldaǵan zań erejeleri men azamattardyń ál-aýqatyn jaqsartý jónindegi memleket qabyldaǵan sharalardy túsindirdi.

2020 jylǵa arnalǵan respýblıkalyq bıýdjet kórsetkishteri, áleýmettik tólemder, memlekettik arnaıy járdemaqylar, kepildik berilgen áleýmettik toptama jáne ataýly áleýmettik kómek, mindetti medıtsınalyq saqtandyrý, sondaı-aq turǵyn úı qoryn basqarýdyń jańa úlgisi máseleleri talqylandy.

S.Ershov 2019 jyly halyqtyń ál-aýqatyn arttyrýǵa, onyń ishinde az qamtylǵan jáne kóp balaly otbasylarǵa memlekettik qoldaý kórsetýge arnalǵan áleýmettik máselelerge erekshe nazar aýdarylǵanyn atap ótti.

Depýtat sapar aıasynda Jezqazǵan qalasynyń aýrýhana qalashyǵynda bolyp, 900 oryndyq mektep qurylysynyń barysymen tanysty, Keńgir kentinde jańartylatyn energııa kózderinen elektr energııasyn óndiretin «Kaz green energy» kásipornynda boldy.

Sátbaev qalasynyń «Qamqor» áleýmettik qoldaý ortalyǵynyń basshylyǵy jáne ujymymen kezdesý barysynda depýtat «halyq únine qulaq asatyn memleket» tujyrymdamasy men Memleket basshysynyń Qazaqstan halqyna Joldaýyn júzege asyrý úshin qabyldanyp jatqan sharalar týraly habardar etti. Sergeı Ershov jastar saıasatyn qoldaý sharalaryna toqtalyp, Senat janynda Jastar keńesin qurý josparlanyp otyrǵanyn aıtty.

Kezdesýge qatysýshylar óz kezeginde oblystaǵy ózekti máselelerdi kóterdi, óıtkeni, qalada aýyz sýǵa baılanysty problema bar, sondyqtan jańa sý qubyrynyń qurylysyn qarastyrý qajet bolyp otyr. Oblystyń sharýa qojalyqtarynda sýbsıdııa alý máseleleri týyndaǵany jaıynda aıtyldy.

Budan keıin S.Ershov Ulytaý aýdanynda zeınetkerlerdi qabyldady. Senator sondaı-aq Ulytaý aýdanyndaǵy týrızmdi damytýdyń negizi bolatyn týrıstik sapar ortalyǵynyń qurylysymen tanysty.

Sonymen birge Parlament Senatynyń depýtattary Nurtóre Júsip pen Dınar Nóketaeva Almatydaǵy A.Rozybakıev atyndaǵy №153 mektep-gımnazııanyń oqytýshylarymen kezdesti.

D.Nóketaeva «Pedagog mártebesi týraly» jańa zańnyń erejeleri men talaptary týraly aıtyp berdi. Bul zań jarty mıllıonnan astam oqytýshylardyń jumysyn retteıdi. Depýtat pedagogtardyń quqyqtaryn keńeıtý, aýyrtpalyqty azaıtý, muǵalim qyzmetine qoıylatyn talaptardy kúsheıtý, materıaldyq emes yntalandyrý men materıaldyq turǵyda qoldaý tetikterin egjeı-tegjeıli túsindirdi.

N.Júsip «Mindetti áleýmettik medıtsınalyq saqtandyrý týraly» zań qabyldanǵannan keıin halyqty áleýmettik qorǵaýdyń qosymsha túri retinde mindetti áleýmettik saqtandyrý, jumys isteıtin azamattardy áleýmettik qaterler týyndaǵan jaǵdaıda qamtamasyz etý úshin memleket qabyldaıtyn sharalar júıesi engizilgenin atap ótti. Jumys isteıtin azamattarǵa áleýmettik járdemaqy tóleý, jumysqa ornalasý, asyraýshysynan aıyrylý, júkti bolýy men bosanýy jáne 1 jasqa deıingi bala kútimi jónindegi baptar egjeı-tegjeıli túsindirildi. Depýtat mindetti áleýmettik medıtsınalyq saqtandyrýdyń negizgi qaǵıdalary týraly habardar etti jáne endi árbir azamattyń densaýlyǵy úshin adam, jumys berýshi jáne memleket jaýapty ekenin atap ótti.

Parlamentshiler tarıhı-mádenı mura máseleleri boıynsha zańnamanyń negizgi erejelerin de túsindirdi.

Al taǵy bir senator Nurlan Qylyshbaev Qapshaǵaı qalasynda eńbek ujymdarymen kezdesti. Parlament Senatynyń depýtaty jumys babyndaǵy saparmen Almaty oblysynyń Qapshaǵaı qalasynda boldy. Senator qýaty 100 Mvt «Eneverse Kunkuat» kún elektr stantsııasyn aralady, medıtsınalyq maqsattaǵy buıymdardy óndirý jónindegi «Kumsýat Farm» mekemesiniń jumysymen, «7-20-25» baǵdarlamasyn júzege asyratyn «Termomaks» seriktestiginiń «Balsu-Lux» turǵyn úı keshenindegi qurylys-montajdaý jumystarynyń barysymen tanysty.

Senator eńbek ujymdarymen kezdesý aıasynda Elbasy Nursultan Nazarbaevtyń áleýmettik bastamalarynyń, Memleket basshysy Qasym-Jomart Toqaevtyń Qazaqstan halqyna Joldaýynyń basymdyqtary men iske asý barysy týraly habardar etti. Sondaı-aq Parlamenttiń 2019 jylǵy zań shyǵarý jumysynyń qorytyndylary týraly aıtyldy.

Qazaqstan Respýblıkasy Parlamenti Senatynyń taǵy bir depýtaty Tóleýbek Muqashev Abaı atyndaǵy Qazaq ulttyq pedagogıkalyq ýnıversıtetiniń professorlyq-oqytýshylar quramymen kezdesti.

Kezdesý aıasynda Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń «Rýhanı jańǵyrý» baǵdarlamasyn júzege asyrý máseleleri jáne «Pedagog mártebesi týraly» zańnyń negizgi erejeleri talqylandy. Qabyldanǵan «Pedagog mártebesi týraly» zań bilim berý salasy qyzmetkerleriniń quqyqtary men áleýmettik qorǵalýyn qamtamasyz etýmen qatar, elimizdegi pedagogıka qaýymynyń mártebesin arttyrýǵa jáne muǵalim bedelin kóterýge baǵyttalǵany aıtyldy.

Depýtat Tóleýbek Muqashev Qazaqstan Respýblıkasy Parlamenti Senatynyń bir jyl ishinde atqarǵan jumysy týraly habardar etti jáne «Pedagog mártebesi týraly» jańa zańnyń mańyzyna toqtaldy. «Kóptegen jyldar boıy bizdiń ustazdarymyzdyń mártebesi men bedeli tómendep ketti. Jańa zańda muǵalimderdi áleýmettik qoldaý, olardyń qyzmeti men shyǵarmashylyǵy jáne quqyqtaryn qorǵaý máseleleri belgilendi. Bul qujat búgingi tańda pedagogtardyń qoldaýyna ıe bolyp otyr», - dedi senator.

Abaı atyndaǵy QazUPÝ Pedagogıka jáne psıhologııa ınstıtýtynyń dırektory, professor Berikjan Álmuhambetov elimizdiń Parlamentinde ótken otyrystar men úkimet saǵattarynda bilim berý sapasyna baılanysty ózekti máseleler udaıy kóterilip, únemi nazarda bolatyny úshin alǵysyn bildirdi.

Jaratylystaný jáne geografııa ınstıtýtynyń dırektory, professor Kúlásh Qaımoldınova búgingi tańda oqýlyqtardyń sapasyna baılanysty syn-pikirler kóp ekenin atap ótti. «Óıtkeni oqý baǵdarlamalary joǵarydan kelip túsedi. Oqýlyqtar osy baǵdarlamanyń negizinde jazylady, al baǵdarlamada oqýshylarǵa túsinýdi qıyndatatyn máseleler kóp. Sondyqtan baǵdarlamalardy oılastyrý qajet. Sonda ǵana oqýlyq sapaly bolady», - dedi K.Qaımoldınova.

Kezdesýde bilim sapasyna qatysty basqa da ózekti máseleler talqylandy. Máselen, Óner, mádenıet jáne sport ınstıtýtynyń dırektory Toqqoja Qojaǵulov búgingi kúni orta mektepterde syzý, sýret jáne eńbek pánderi biriktirilip, olarǵa bólingen saǵattar qysqartylǵanyn atap ótti. Bul jas urpaqtyń óner pánderi boıynsha laıyqty bilim ala almaýyna ákelip soǵady. Syzý men sáýlet jáne dızaınǵa baılanysty tehnıkalyq joǵary oqý oryndaryna túsýdi josparlap júrgen mektep túlekteri osy salalar boıynsha daıyndyǵy bolmaıdy jáne kóptegen qıyndyqtarǵa tap bolady. Ustazdar qaýymy osyǵan baılanysty máseleni sheshýge kómek kórsetýdi surady.