Senatorlar aımaqtardy aralamaq
ASTANA. 21 sáýir. QazAqparat - Búgin Qasym-Jomart Toqaevtyń tóraǵalyq etýimen Qazaqstan Respýblıkasy Parlamenti Senatynyń Bıýro otyrysy boldy.
Bıýro músheleri aldaǵy 24 sáýir kúni bolatyn Senat otyrysynyń kún tártibin qarady. Palata otyrysyna tórt máseleni shyǵarý josparlanyp otyr. Atap aıtqanda, senatorlar «Ruqsattar jáne habarlamalar týraly» jáne «Qazaqstan Respýblıkasynyń keıbir zańnamalyq aktilerine ruqsat berý júıesi máseleleri boıynsha ózgerister men tolyqtyrýlar engizý týraly» (birinshi oqylym) zań jobalaryn qaraıdy. Bul zań jobalaryn Memleket basshysy N.Nazarbaev shuǵyl qaralýy qajettigi týraly jarııalaǵan bolatyn.
Odan basqa, Senat jalpy otyrysta Qazaqstan men Ózbekstan arasyndaǵy strategııalyq áriptestik týraly shartty ratıfıkatsııalaý týraly jáne Eýrazııa ekonomıkalyq qoǵamdastyǵyna múshe memleketterdiń eksporttyq baqylaýynyń biryńǵaı tártibi týraly kelisimniń kúshin joıý týraly zań jobalaryn qaraıdy.
Bas komıtetterdiń tóraǵalary Palata otyrysynda zań jobalaryn qaraýǵa ázirlik barysy týraly habardar etti.
Senat Bıýrosynda sondaı-aq Májiliste maquldanǵan birqatar zań jobalary bólindi. Turaqty komıtetterge jáne Sanat Apparatyna «Ruqsattar jáne habarlamalar týraly» jáne «Qazaqstan Respýblıkasynyń keıbir zańnamalyq aktilerine ruqsat berý júıesi máseleleri boıynsha ózgerister men tolyqtyrýlar engizý týraly» zań jobalary berildi. Sonymen qatar, Senatqa Qylmystyq-is júrgizý kodeksi men «Qazaqstan Respýblıkasynyń keıbir konstıtýtsııalyq zańdaryna ózgerister engizý týraly» zań jobalary jáne zańnamaǵa qylmystyq-is júrgizý jetildirý máseleleri boıynsha túzetýler engizý týraly zań jobasy túsken bolatyn. Bul zań jobalary boıynsha Konstıtýtsııalyq zańnama, sot júıesi jáne quqyq qorǵaý organdary komıteti bas komıtet bolyp belgilendi.
Senattaǵy «Óńir» depýtattyq tobynyń usynýy boıynsha Bıýro Ońtústik Qazaqstan oblysyndaǵy qalalyq jáne aýdandyq máslıhattardyń birqatar depýtattaryn otandyq quqyqtyq júıeni jetildirýge baǵyttalǵan qyzmeti úshin Senattyń Qurmet gramotasymen marapattaý týraly qaýly etti.
Odan basqa, Q.Toqaev Senat Tóraǵasynyń orynbasary Qaırat Ishanovqa jáne Senat Apparatynyń Basshysy Aleksandr Sýdınge TMD Parlamentaralyq Assambleıasynyń atynan «Dostastyq» ordenin tabys etti.
Bıýro otyrysynyń sońynda Senat Tóraǵasy Qasym-Jomart Toqaev joǵarǵy Palatanyń depýtattary 28 sáýir men 5 mamyr aralyǵynda elimizdiń aımaqtaryna attanatynyn habardar etti. Senatorlar saılaýshylarmen kezdesip, áleýmettik sala jáne ekonomıkanyń naqty sektorynyń kásiporyndarynda bolady. Depýtattar Parlamenttiń qazirgi kezdegi zań shyǵarý qyzmeti jáne Memleket basshysynyń jyl saıynǵy Joldaýynda alǵa qoıylǵan mindetterdi iske asyrý barysy týraly jurtshylyqty habardar etedi.
