Senatorlar áıelderdiń quqyqtary men balalardyń qaýipsizdigin qamtamasyz etetin zańdy qaraıdy
ASTANA. KAZINFORM — Senat spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda depýtattar salalyq komıtetterdiń osy aptadaǵy is-sharalaryn jáne 11 sáýirde ótetin Senat otyrysynyń kún tártibin bekitti.
Otyrysty ashqan Máýlen Áshimbaev Memleket basshysy sý tasqyny saldarynan qalyptasqan aýyr jaǵdaıǵa baılanysty úndeýinde belgilep bergen mindetterge toqtaldy.
«On oblysta tótenshe jaǵdaı jarııalandy. Prezıdentimiz sý tasqyny saldarymen kúresýge naqty tapsyrmalar berdi. Sondaı-aq, zardap shekken azamattardyń shyǵyndary tolyq óteletinin aıtty. Palatamyz da, óz tarapynan tasqynmen kúreske kómek kórsetýde. Bir top Senat depýtaty zardap shekken óńirlerge baryp, jergilikti bılikke jáne turǵyndarǵa qolǵabys kórsetýde. Osyndaı syn-saǵatta barsha qoǵam bolyp birlesip, tótenshe jaǵdaıdyń saldarymen kúreske jumylý asa mańyzdy», – dedi Senat tóraǵasy.
Іs-shara barysynda senatorlar Palata otyrysynyń kún tártibin bekitti. Soǵan sáıkes aldaǵy beısenbide depýtattar «QR keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdy jáne oǵan ilespe «QR Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdy birinshi oqylymda qaraıdy. Bul zańdar otbasylyq-turmystyq jáne qoǵamdyq salalardy qosa alǵanda, zorlyq-zombylyqtyń kez kelgen túri úshin jazany qatańdatý boıynsha Memleket basshysynyń tapsyrmasyn oryndaý úshin ázirlengen.
«Prezıdentimiz Qasym-Jomart Kemeluly Toqaev áıelderdiń quqyqtary men balalardyń qaýipsizdigin qamtamasyz etýge únemi basa mán berip keledi. Memleket basshysynyń tapsyrmalaryn oryndaý úshin tıisti zańdar ázirlendi. Senatorlar áıelder men balalardyń quqyqtaryn qorǵaý sharalaryn kúsheıtýdi qoldaıdy. Zańdardyń qoǵamdyq mańyzdylyǵyn eskere otyryp, olardy beısenbidegi Palata otyrysyna shyǵarýdy kózdep otyrmyz», – dedi Máýlen Áshimbaev.
Qujattarda kórsetilgen normalar balalardyń qaýipsizdigin qamtamasyz etý máseleleri boıynsha memlekettik saıasattyń quqyqtyq, ekonomıkalyq, áleýmettik jáne uıymdastyrýshylyq negizderin jetildirýge, áıelder men balalarǵa qatysty qylmystardyń aldyn alýǵa jáne jolyn kesýge baǵyttalǵan.
Senat tóraǵasy atap ótkendeı, bul zańdar qoǵamda úlken pikirtalas týdyrdy. Osyǵan baılanysty senatorlar azamattarmen jeke kezdesýler ótkizdi jáne qujattardyń jekelegen normalaryna qatysty júzdegen ótinishti qarady. Sondaı-aq Palata Spıkeri zańnyń negizgi erejelerin túsindirý jumystaryn otyrysqa deıin belsendi júrgizip, odan keıin de joǵary deńgeıde jalǵastyrý kerek ekenin aıtty.
Sonymen qatar balalardyń qaýipsizdigin qamtamasyz etý úshin balalarǵa arnalǵan ınternattyq uıymdardy memlekettik baqylaýdyń erekshe tetikteri, balalarǵa arnaýly áleýmettik qyzmetter jáne bilim berý-saýyqtyrý qyzmetterin kórsetetin mekemelerdi lıtsenzııalaý mindettiligi engiziledi.
Sondaı-aq Palata otyrysynda «QR keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» zań qaralady. Bul qujat tıisti salalardaǵy zańnamany jetildirýge arnalǵan.
