Senatorlar áıelderdi qoldaýǵa arnalǵan «Baqytty otbasy» ortalyǵynyń qyzmetimen tanysty
ASTANA. KAZINFORM - Senat tóraǵasy Máýlen Áshimbaev Palatanyń bir top depýtatymen birge áıelderge arnalǵan «Baqytty otbasy» bilim jáne aqparattyq-konsýltatsııalyq ortalyǵyna bardy, dep habarlaıdy Senattyń baspasóz qyzmeti.
Ortalyqtyń jetekshisi Yrza Tursynzada «Baqytty otbasy», birinshi kezekte, kóp balaly, múmkindigi shekteýli bala tárbıelep otyrǵan, jumyssyz, qıyn jaǵdaıǵa tap bolǵan jáne jalǵyzbasty analarǵa jan-jaqty qoldaý kórsetetin platforma ekenin aıtty. Mekemede mamandandyrylǵan kabınetter jumys isteıdi. Sondaı-aq kondıterlik is, toqyma, aǵylshyn tili, jumsaq oıynshyqtar tigý jáne taǵy basqa kásip túrlerin úıretetin tegin kýrstar qarastyrylǵan. Munyń bári áıelderge ózin ózi damytýǵa jáne jeke kásibin bastaýǵa jol ashatyn qadamdar ekeni sózsiz.
Máýlen Áshimbaev áıelder quqyǵyn qorǵaýda jáne ınklıýzıvti Qazaqstan qalyptastyrýda osyndaı ortalyqtardyń mańyzy zor ekenin atap ótti. Sondaı-aq múgedektigi bar adamdardy qoldaýǵa jáne olardy ońaltýǵa, atalǵan sanattaǵy azamattardyń qoǵam ómirine belsendi aralasyp, jumyspen qamtylýyna arnalǵan sharalardyń bereri mol ekeni aıtyldy.
«Prezıdentimiz Qasym-Jomart Kemeluly Toqaevtyń tapsyrmasy boıynsha otbasy ınstıtýtyn nyǵaıtýǵa, áıelder men balalardyń quqyqtaryn qorǵaýǵa arnalǵan zańdar ázirlenip, qabyldandy. Osy zańdar arqyly memlekettik otbasy saıasatyn qalyptastyrýǵa jaýapty ýákiletti organnyń mártebesi aıqyndaldy. Ómirde qıyn jaǵdaıǵa ushyraǵan otbasylardy qoldaýǵa arnalǵan erejeler de qarastyryldy. Sondaı-aq áıelder men balalarǵa qarsy qylmystyń jaýapkershiligi kúsheıtildi. Memleket basshysy belgilep bergen osy baǵyttaǵy mindetterdi iske asyrýda «Baqytty otbasy» sııaqty ortalyqtar mańyzdy ról atqarady. Aldaǵy ýaqytta bizdiń birlesken jumysymyz múmkindigi shekteýli azamattarǵa jaıly jaǵdaı jasaýǵa jáne otbasy ınstıtýtyn nyǵaıtýǵa tyń serpin beredi dep senemiz», – dedi Máýlen Áshimbaev.
Іs-shara sońynda Ortalyq basshysy jańa bastamalarǵa qoldaý bildirip, yntymaqtastyq tanytqany úshin senatorlarǵa alǵys aıtty. Sondaı-aq ol aldaǵy josparlaryna toqtalyp, áleýmettik kásipkerlikti damytýǵa arnalǵan jańa usynystaryn atap ótti.
