Senatorlar aýyl sharýashylyǵy ónimderin tereń óńdeý máselesin zerdeledi
ASTANA. KAZINFORM - Búgin Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıteti Almaty oblysynda kóshpeli otyrys ótkizdi.
Onda aýyl sharýashylyǵy ónimderin qaıta óńdeý taqyryby – kún tártibindegi basty másele boldy. Prezıdenttiń Qazaqstan halqyna Joldaýyn iske asyrý aıasynda ótken sharaǵa komıtet depýtattary, Aýyl sharýashylyǵy mınıstrligi men memlekettik organdardyń ókilderi, máslıhat depýtattary, sondaı-aq qaıta óńdeý kásiporyndary men agroónerkásip keshenderiniń basshylary qatysty.
Aýyl sharýashylyǵy ónimderin qaıta óńdeý, azyq-túlik qaýipsizdigin qamtamasyz etý, sondaı-aq elimizdiń eksporttyq áleýetin arttyrýdy talqylaý – otyrystyń basty maqsaty boldy. Aýyl sharýashylyǵy ónimderin qaıta óńdeý deńgeıin arttyrý jáne Qazaqstan Prezıdenti qoıǵan mindetterdi oryndaý, atap aıtqanda, qaıta óńdelgen ónimder úlesin úsh jyl ishinde 70%-ǵa qol jetkizý máseleleri basty nazarǵa alyndy.
«Aýyl sharýashylyǵy ónimderin qaıta óńdeý – bul elimizdiń ekonomıkasyn nyǵaıtýǵa, ımportqa táýeldi bolýdy azaıtýǵa jáne azyq-túlik qaýipsizdigin qamtamasyz etýge yqpal etetin strategııalyq mańyzdy baǵyt. Agroónerkásip keshenindegi aınalym qarjysynyń jetispeýi, shıkizat sapasynyń tómendigi jáne ónim óndirý úderisin avtomattandyrýdyń jetkiliksizdigi sııaqty problemalardy sheshý úshin qarjylaı qoldaý men tehnologııalyq ınnovatsııa úılesim tapqan keshendi sharalar qajet», - dep atap ótti komıtet tóraǵasy Álı Bektaev.
Otyrys barysynda qaıta óńdeý kásiporyndary men aýyl sharýashylyǵy ónimin óndirýshiler arasyndaǵy yntymaqtastyqty jaqsartý, aýyl sharýashylyǵy kooperatsııasyn damytý, shıkizat sapasyn jaqsartý jáne ónimdilikti arttyrý úshin iri agroónerkásip holdıngterin qurý týraly usynystar qaraldy. Sondaı-aq agrosektorda shaǵyn jáne orta bızneske jeńildikti kredıtteý júıesin ázirleý máselesi talqylandy.
Otyrys qorytyndysy boıynsha usynymdar toptamasy ázirlendi. Ol usynystar odan ári qaraý jáne iske asyrý maqsatynda Úkimetke jiberiletin boldy. Kezdesýge qatysýshylar aýyl sharýashylyǵy ónimderin qaıta óńdeý máseleleriniń sheshimi memlekettik organdar, bıznes jáne aýyl sharýashylyǵy óndirýshileri arasyndaǵy keshendi tásildi jáne ózara tyǵyz is-qımyldy talap etetinin atap ótti.