Senatorlar Atyraý oblysynyń óńdeý ónerkásibin damytý máselelerin talqylady

ATYRAÝ. QazAqparat - Depýtattar Senattyń Ekonomıkalyq saıasat, ınnovatsııalyq damý jáne kásipkerlik komıtetiniń kóshpeli otyrysyn Atyraý oblysynda ótkizdi. Kezdesýdiń taqyryby óńdeý ónerkásibin damytý máselelerin talqylaý boldy, dep habarlaıdy QazAqparat.

Otyrys jumysynyń ashylý barysynda komıtet tóraǵasy Súıindik Aldashev ınnovatsııalar men joǵary tehnologııalardy tarta otyryp, ishki naryqqa baǵdarlanǵan óńdeýshi ónerkásipti damytý qajettigin atap ótti.

«Búgin otyrysta ortalyq jáne jergilikti atqarýshy organdarmen birlesip, óńdeýshi ónerkásiptiń júıeli máseleleri qaralyp, talqylandy. Bıznes ókilderi tarapynan Komıtettiń odan ári zańnamalyq jumysynda qarastyrýdy jáne eskerýdi, onyń ishinde qajet bolǵan jaǵdaıda ortalyq memlekettik organdarmen birlesip zańnamalarǵa tıisti túzetýler ázirleýdi qajet dep sanaıtyn naqty suraqtar men usynystar aıtyldy», - dedi senator Aldashev.

Atyraý oblysy ákimdiginiń málimetinshe, aǵymdaǵy jyldyń qańtar-sáýir aralyǵynda ónerkásip óniminiń kólemi 3,7 trln teńgeni qurap, ótken jyldyń sáıkes kezeńimen salystyrǵanda 6,7 paıyzǵa ósken. Óńdeý ónerkásibi bul rette 14,6%-ǵa ósip, 231,8 mlrd teńgeni qurady.

Sonymen qatar, otyrys aıasynda senator Saǵyndyq Luqpanov el ekonomıkasyn odan ári damytýǵa qajetti kómirsýtek shıkizatyn óńdeýdiń túıtkildi máselelerin kóterdi.

Sondaı-aq jıyn barysynda Investıtsııalar komıtetiniń ókilderi men jergilikti kásipkerler óńdeý ónerkásibin damytý boıynsha baıandama jasady.

Depýtattar kóshpeli sessııa aıasynda oblystaǵy gaz-hımııa keshenin, aralas tsıkldi gaz týrbınalyq elektr stantsııasyn, polımer jáne kabel ónimderin shyǵaratyn zaýyttardy, mal sharýashylyǵy keshenin jáne basqa da birqatar óndiristik nysandardy aralady.