Senatorlar Atyraý oblysyndaǵy arnaıy ekonomıkalyq aımaqtyń tıimdiligin talqylady
Atyraýda Parlament Senatynyń Qarjy jáne bıýdjet komıtetiniń kóshpeli otyrysy ótti. Oǵan komıtet tóraǵasy Serikbaı Trumov bastaǵan senatorlar, mınıstrlikter ókilderi, Atyraý oblysynyń ákimi Serik Shápkenov Senat depýtattary, Indýstrııa jáne ınfraqurylymdyq damý mınıstrligi, Ulttyq ekonomıka, Qarjy jáne Energetıka mınıstrlikteriniń ókilderi, arnaıy ekonomıkalyq aımaqta tirkelgen kásipkerlik nysandarynyń basshylary qatysty.
«Arnaıy ekonomıkalyq aımaqtardy qurýdaǵy basty maqsat – ınvestıtsııa tartý, básekege qabiletti óndiristi damytý, jańa tehnologııalardy iske qosý arqyly ımportty almastyrý jáne óńir turǵyndaryn jumyspen qamtý. Qazir elimizde qurylǵan arnaıy ekonomıkalyq aımaqtarda 300-den asa kásiporyn jumys isteıdi. Bul kásiporyndar 21 myń adamdy jumyspen qamtyp otyr. Sol sebepten, arnaıy ekonomıkalyq aımaqtardyń tıimdiligin arttyryp, túıindi máselelerdi sheshý úshin birlese jumys isteýimiz qajet», -dedi Serikbaı Trumov.
Atyraý oblysyndaǵy «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵy Prezıdent Jarlyǵymen quryldy. Bul aımaqta birneshe maqsatty iske asyrý kózdelgen.
Birinshiden, kómirsýtek shıkizatyn tereń óńdeý, qosylǵan quny joǵary keń básekege qabiletti munaı-hımııa ónimderin óndirý maqsatynda álemdik deńgeıdegi munaı-hımııa zaýyttaryn qurý. Ekinshiden, serpindi ınvestıtsııalyq jobalardy ázirleý jáne iske asyrý. Úshinshiden, hımııa ónerkásibi jáne munaı-hımııa ónimderin óndirý.
Sondaı-aq, arnaıy ekonomıkalyq aımaq sheńberinde qyzmettiń basym túrlerin júzege asyrýǵa tikeleı arnalǵan nysandardy iske qosý, kópsalaly aýrýhanany salý jáne paıdalanýǵa berýmen aınalysatyn obektilerdiń qyzmetin iske qosý kózdelgen.
Eske sala ketelik, budan buryn Nelson Mandelanyń nemeresi áıelder túrli jobaǵa kóbirek qatyssa, oń nátıje bolatynyn aıtqan edi.
