Senatorlar atom energııasyna qatysty zań jobasyn qarady
NUR-SULTAN. QazAqparat - Búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysy ótti. Onda depýtattar «Qazaqstan Respýblıkasynyń keıbir zańnamalyq aktilerine atom energııasyn paıdalaný máseleleri boıynsha ózgerister men tolyqtyrýlar engizý týraly» zań jobasyn qarady, dep habarlaıdy QazAqparat.
Zań jobasy ıadrolyq tehnologııalardy óndiris kezinde qoldanýǵa, saqtaýǵa, paıdalaný men tasymaldaýǵa qatysty qaýipti azaıtýǵa arnalǵan.
Senat baspasóz qyzmetiniń málimetinshe, zańǵa engiziletin jańashyldyqtardyń biri - osy saladaǵy lıtsenzııalaýdyń ashyqtyǵyn qamtamasyz etý. Sol arqyly atom energııasyn qoldaný salasyndaǵy naqty qyzmet túrlerin anyqtaý jáne lıtsenzııa berilmeıtin qyzmet túrlerin de lıtsenzııalaý kózdelip otyr.
«Atom energııasyn qoldaný salasyndaǵy qyzmetterdi retteýdiń naqty tetikterin anyqtaý jáne elimizdegi atom salasyn retteýdiń obektileri men sýbektilerine qoıylatyn talaptardy naqtylaý ıadrolyq ári radıatsııalyq qaýipsizdikti kúsheıtedi. Bul óz kezeginde qorshaǵan ortany qorǵaýǵa jáne azamattardyń densaýlyǵyn saqtaýǵa oń áser etedi. Sondaı-aq, Qazaqstan qabyldaǵan halyqaralyq mindettemelerdi iske asyrýdy qamtamasyz etedi», – dedi senator Edil Mamytbekov.
Komıtet tóraǵasy Dáýren Ádilbekovtiń aıtýynsha, zańǵa engiziletin ózgerister tek MAGATE-nyń qaýipsizdik boıynsha halyqaralyq talaptaryn oryndaýǵa ǵana baǵyttalyp otyrǵan joq. Bul jańa normalar kásipkerler úshin júktemeni jáne ákimshilik kedergilerdi azaıtady. Odan bólek, osy saladaǵy memlekettik qyzmetterdi «bir ótinish» qaǵıdasy boıynsha kórsetýge múmkindik beredi.
