Senatorlar áskerılerdiń baspana máselesin sheshýge baǵyttalǵan qujatqa túzetý engizdi
Zań jobasynyń maqsaty - arnaýly memlekettik organdar qyzmetkerleri men áskerı qyzmetshilerdiń áleýmettik-quqyqtyq mártebesin arttyrý, olarǵa jáne olardyń otbasy múshelerine turǵynjaıǵa quqyqtaryn iske asyrýdyń teń múmkindikterin belgileý, áskerı qyzmet ótkerý máseleleri boıynsha zańnamadaǵy qaıshylyqtar men olqylyqtardy alyp tastaý.
QR Qorǵanys mınıstriniń orynbasary Sultan Qamaletdınovtyń aıtýynsha, osy baǵytta úsh zańǵa túzetý engiziledi.
«Turǵyn úı qatynasy týraly» zańda mynalar qarastyrylǵan:
- birinshi - qaıtys bolǵan áskerı qyzmetshiniń, arnaýly organ qyzmetkeriniń otbasy múshesine qyzmettik baspanany jekeshelendirý, aqshalaı ótemaqy alý, aıyrbastaý quqyǵyn berý;
- ekinshi - qyzmettik turǵyn úıdi qaldyq quny boıynsha nemese óteýsiz jekeshelendirý;
- úshinshi – qyzmettik úımen eki ret qamtamasyz etýdi shekteý;
- tórtinshi – «modýldi turǵyn úı» uǵymyn engizý.
«Bul jabyq áskerı qalashyqta jyldam turǵyzylatyn, qajet bolsa turǵan jerin aýystyrýǵa bolatyn turǵyn úı. Mundaı úıdi satyp alý qysqa ýaqytta áskerdi turatyn orynmen qamtamasyz etýge, al geosaıası jaǵdaı ózgergende, olardy shyǵynsyz basqa jerge kóshirýge múmkindik beredi», - dedi S. Qamaletdınov.
«Áskerı qyzmet jáne áskerı qyzmetshiniń mártebesi týraly» zańda:
- áskerı qyzmetshiniń quqyqtary men mindetterin keńeıtý;
- attestattaý kezinde polıgrafologııalyq zertteý júrgizý;
- qyzmetten ketken soń, oǵan qaıta kirgenge deıin úsh aıdan aspasa ony úzdiksiz dep belgileý - dep atap kórsetilgen.
Palata depýtattary zań jobasyn talqylaý barysynda áskerı qyzmetshilerdiń quqyqtaryn retteý máselelerinde keshendi kózqarasty qamtamasyz etý qajettiligine baılanysty, «Áskerı qyzmet jáne áskerı qyzmetshilerdiń mártebesi týraly» Zańnyń 6-baby 2-tarmaǵynyń qoldanystaǵy redaktsııasyn saqtaý bóliginde ózgerister engizý qajettiligi týyndady.
Osy oraıda qujatty talqylaýdan keıin, Senat engizgen túzetýmen zań jobasy Májiliske qaıtaryldy.
