Senatorlar áskerı-tehnıkalyq kómek týraly kelisimdi qaraıdy

NUR-SULTAN. QazAqparat - Senat spıkeri Máýlen Áshimbaevtyń tóraǵalyq etýimen Palata Bıýrosynyń otyrysy ótti. Onda depýtattar 2021 jylǵy 25 qarashada ótetin Senat otyrysynyń kún tártibin bekitti, dep habarlaıdy QazAqparat tilshisi.

Senattyń kezekti otyrysynda depýtattar «Salyq jáne bıýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» QR Kodeksin (Salyq kodeksi) qoldanysqa engizý týraly» QR Zańyna ózgerister men tolyqtyrýlar engizý týraly» zań jobasyn qaraıdy. Zań jobasy bıznes pen azamattardy qoldaýdy, kóleńkeli ekonomıkaǵa qarsy is-qımyl boıynsha salyqty ákimshilendirý sharalaryn jaqsartýdy kózdeıdi.

Senatorlar aldaǵy otyrysta sonymen qatar «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy óteýsiz áskerı-tehnıkalyq kómek kórsetý týraly kelisimdi ratıfıkatsııalaý týraly» jáne «Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy óteýsiz áskerı-tehnıkalyq kómek kórsetý týraly kelisimdi ratıfıkatsııalaý týraly» zań jobalaryn da qaraıtyn boldy. Qazaqstan bul kelisimder aıasynda Qyrǵyzstan men Tájikstanǵa áskerı múlik berý arqyly áskerı-tehnıkalyq kómek kórsetedi. Al kómek alýshy taraptar ózderine alǵan áskerı múlikti nemese ony qoldaný quqyǵyn úshinshi tarapqa bermeý týraly mindetteme alady.

Senat otyrysynyń kún tártibine áskerı yntymaqtastyqqa qatysty taǵy bir zań jobasy shyǵarylady. Naqty aıtqanda, depýtattar aldaǵy beısenbide «Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy tájik-aýǵan shekarasyna irgeles aýdandarda qaýipsizdikti qamtamasyz etýde áskerı-tehnıkalyq járdem kórsetý týraly kelisimdi ratıfıkatsııalaý týraly» zań jobasyn da qaraıdy.

Bıýro otyrysynda sondaı-aq Májilisten kelip túsken zań jobalary Senat komıtetterine pysyqtaýǵa bólinip berildi.