Senatorlar áskerı qyzmetshilerdi baspanamen qamtý máselesi týraly aıtty
ASTANA. QazAqparat - Senator Darıǵa Nazarbaeva bastaǵan Parlament Senaty Halyqaralyq qatynastar, qorǵanys jáne qaýipsizdik komıtetiniń músheleri 68665 desanttyq shabýyldaýshy áskerı bóliminde boldy. Bul týraly Senattyń baspasóz qyzmeti habarlaıdy.
Depýtattar áýe, brondy tank jáne avtomobıl tehnıkasy men zymyran-artıllerııalyq qarýlar murajaıynda boldy. Meımandarǵa odan basqa áskerı tehnıkanyń, atý qarýlarynyń jáne qazaqstandyq áskerı desanttardyń kıim úlgileri kórsetildi.
Sapar barysynda delegatsııa músheleri qysqa merzimde qyzmetin óteıtin áskerı qyzmetshilerdiń jaǵdaıymen de tanysty. Senator Talǵat Musabaev áskerı qyzmetshilerge Memleket basshysynyń bes áleýmettik bastamasy týraly áńgimeledi.
Depýtat sonymen qatar «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zańynyń erejeleri týraly aıtty. Bul zań áskerı qyzmettiń artyqshylyqtaryn, áskerı qyzmetshilerdiń jáne olardyń otbasylarynyń áleýmettik-quqyqtyq mártebesin kóterýge baǵyttalǵan.
Senat komıtetiniń tóraǵasy D.Nazarbaeva atap ótkendeı, bul zań Senat depýtattarynyń bastamasymen ázirlengen bolatyn. Engizilgen ózgeristerge sáıkes, áskerı qyzmetshilerdiń jeke esep-shotyna sol aımaqtaǵy turǵyn úıdiń ár sharshy metriniń qunyna eseptelgen kólemde turǵyn úı tólemderi túsetin bolady. Ol otbasynyń quramyna baılanysty bir adamǵa 18 sharshy metr kólemde esepteledi.
Turǵyn úı tólemderin jeke turǵyn úı satyp alýǵa, ony keıinnen satyp alý úshin jalǵa alý tólemi úshin paıdalanýǵa bolady.
Sondaı-aq, bul qarjyny turǵyn úı jáne turǵyn úı qurylysy kooperatıvine qatysýǵa, turǵyn úı qurylysy jınaǵy túrinde tolyqtyrýǵa jáne turǵyn úı jaǵdaıyn jaqsartýǵa qoldanýǵa da bolady. Senatorlar sondaı-aq «Nurly jol» jańa temirjol vokzalynda da boldy. Olar qazirgi zamanǵy ınfraqurylym nysanynyń múmkindikterimen tanysty. Vokzal jolaýshylar tasymalyn, kezegin basqarýdyń, qaýipsizdigin jáne elektrondyq bılet satýdyń zerdeli júıelerimen jabdyqtalǵan. Halyqaralyq qatynastar, qorǵanys jáne qaýipsizdik komıtetiniń músheleri Astanadaǵy №2 jylý elektr ortalyǵynda da boldy.
Senator Serik Jaqsybekov kásiporyn ujymyna Memleket basshysynyń bes áleýmettik bastamasy týraly jan-jaqty áńgimelep berdi. Ol «7-20-25» baǵdarlamasy turǵyn úı ıpotekasyna qol jetkizý múmkindigin arttyryp, turǵyn úı sektoryn kúrdeli ahýaldan tolyqtaı shyǵaratynyn atap ótti.
Senator joǵary bilim alýǵa qol jetkizý múmkindikterin ońaılatý jáne onyń sapasyn kóterý máselelerine de egjeı-tegjeıli toqtaldy. Ol 2018-2019 oqý jyly jyl saıyn bólinetin 54 myń bilim grantyna qosymsha 20 myń qosylatyny týraly aıtty. D.Nazarbaeva kásiporyn nysandaryn aralaý barysynda basqarýdyń tıimdiligi, ekologııa, otyn sapasy, Astanany gazdandyrý, tutynatyn otyn kólemin únemdeýge múmkindik beretin ınnovatsııalyq tehnologııalardy engizý máselelerin kóterdi. Kásiporyn jumysshylary turǵyn úımen qamtamasyz etý, naýqas paraǵyna tólem jasaý, elimizdiń joǵary oqý oryndarynda syrttaı joǵary bilim alý sekildi birqatar ózekti máselelerge senatorlardyń nazaryn aýdardy.
D.Nazarbaeva Prezıdent bastamalaryn iske asýyna baılanysty ashylatyn múmkindikterdi aıta kelip, jas mamandardy ózderiniń kásibı biliktiligin kóterýge shaqyrdy. Senatorlar sondaı-aq «Boeing 737MAX 8» ushaǵynyń alǵashqy saparyn qarsy alý saltanatyna qatysty jáne Qazaqstannyń áýe tasymaly salasy men áýe flotynyń damý keleshegin talqylady.
