Senatorlar áskerı qyzmet týraly zańdy qaraıdy

ASTANA. KAZINFORM – Búgin Senat spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda depýtattar 27 aqpan kúni bolatyn Senat otyrysynyń kún tártibin bekitti jáne Komıtetterdiń aldaǵy otyrystarynda kóteriletin máselelerdi talqylady.

Otyrys barysynda Bıýro músheleri Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn iske asyrý aıasynda 28 aqpanda «Eńbek adamy – ulttyq ekonomıkanyń ósýi men el órkendeýiniń negizi» taqyrybyna arnalǵan parlamenttik tyńdaý ótkizý týraly qaýly qabyldady.

- Prezıdentimiz Qasym-Jomart Kemeluly Toqaev 2025 jyldy «Jumysshy mamandyqtar jyly» dep jarııalaǵany belgili. Bul bastama eńbek adamynyń bedelin arttyrýdy, jastardy osy salaǵa jumyldyrýdy jáne eńbek naryǵynda suranysqa ıe mamandyqtar boıynsha bilikti kadrlar daıarlaýdy kózdeıdi. Sondyqtan kadr tapshylyǵyn jáne bul baǵyttaǵy basqa da ózekti máselelerdi jan-jaqty zerdelep, olardy sheshý úshin qajetti sharalar qabyldaý asa mańyzdy, – dedi Senat tóraǵasy.

Osy aptada Senat komıtetteri múddeli memlekettik organdardyń qatysýymen ótkizetin is-sharalarda ırrıgatsııa júıelerin jańǵyrtý, sý sharýashylyǵyna qajetti kadrlar daıarlaýdy qamtamasyz etý jáne bıologııalyq qaýipsizdik máseleleri qozǵalady.

Sonymen qatar Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn iske asyrý aıasynda Jol qozǵalysy qaýipsizdigin qamtamasyz etý jáne jol-kólik oqıǵalarynyń aldyn alý máseleleri», sondaı-aq, «Ózekti ınstıtýtsıonaldyq negizder: memlekettik aýdıtti odan ári damytý» taqyryptaryna arnalǵan eki dóńgelek ústel uıymdastyrylady.

Bıýro otyrysynda bekitilgen kún tártibine sáıkes Palata depýtattary aldaǵy beısenbide «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstan Respýblıkasy men Reseı Federatsııasynyń birtutas energetıkalyq júıeleriniń qatar jumys isteýin qamtamasyz etý jónindegi sharalar týraly kelisimdi ratıfıkatsııalaý týraly», «Birikken Ulttar Uıymynyń bólýdi baqylaý jónindegi kúshterine (UNDOF) resýrs usynatyn Qazaqstan Respýblıkasynyń Úkimeti men Birikken Ulttar Uıymy arasyndaǵy ózara túsinistik týraly memorandýmdy ratıfıkatsııalaý týraly» jáne «2024 jylǵy 14 aqpandaǵy Birikken Ulttar Uıymynyń bólýdi baqylaý jónindegi kúshterine (UNDOF) resýrs usynatyn QR Úkimeti men Birikken Ulttar Uıymy arasyndaǵy ózara túsinistik týraly memorandýmǵa hattar almasý nysanyndaǵy kelisimdi ratıfıkatsııalaý týraly» zańdardy qaraıdy. Bul qujattar atalǵan salalardaǵy zańnamalardy jetildirýge arnalǵan.

Budan basqa, Palata otyrysynda senatorlar «Qazaqstan Respýblıkasynyń keıbir zańnamalyq aktilerine rezervtegi áskerı qyzmet jáne jekelegen ortalyq memlekettik organdardyń fýnktsııalaryn qaıta bólý máseleleri boıynsha ózgerister men tolyqtyrýlar engizý» týraly zańdy birinshi oqylymda qaraıdy. Zań Qarýly Kúshterdi, basqa da áskerler men áskerı quralymdardy rezerv qımyldaryna daıyn rezervtik kúshtermen qamtamasyz etý úshin quqyqtyq negiz qurý maqsatymen ázirlendi.

Bıýro otyrysynda osyǵan deıin Májilisten kelip túsken zańdar jumys úshin Senattyń turaqty Komıtetterine bólinip berildi.

Eske salsaq Astanada kezekti bos jumys oryndary jármeńkesi ótetini týraly jazǵan edik.