Senatorlar áskerı bilim berý salasyndaǵy aqparattyq qaýipsizdik máselesin talqylady
ASTANA. KAZINFORM – Senattyń Halyqaralyq qatynastar, qorǵanys jáne qaýipsizdik komıtetiniń depýtattary Almatyda kóshpeli otyrys ótkizdi. Onda áskerı bilim berý salasynda Kıberqalqan tujyrymdamasy aıasynda aqparattyq qaýipsizdikti qamtamasyz etý máseleleri talqylandy.
Otyrysty kirispe sózimen ashqan Komıtet hatshysy Darhan Qydyráli aqparattyq-kommýnıkatsııalyq tehnologııanyń qarqyndy damýy, ınfraqurylymdy qorǵaýda jahandyq tsıfrlandyrý úrdisteri tıisti is-áreketti talap etetinin atap ótti. Aqparattyq qaýipsizdikti qorǵaý sharalarynyń saqtalmaýy jaǵymsyz jaǵdaıǵa ákep soǵýy múmkin jáne el qaýipsizdigine tikeleı qater tóndiredi.
«Qazirgi álem tehnologııanyń qarqyndy damýyna kýá boldy, bul kıberqaýipsizdik qaýpiniń arta túsýine ákeldi. Kıbershabýyldar qaýpi barǵan saıyn aqyldy jáne talǵampaz bola bastaıdy, ol bizdiń daǵdymyz ben bilimimizdi únemi jetildirýdi talap etedi. Áskerı bilim bul protseste mańyzdy ról atqarady. Óıtkeni ol mamandardy qorǵanys jáne qaýipsizdik týraly bilimmen qamtamasyz etip qana qoımaıdy, sonymen qatar qaýip-qaterge jedel jaýap bere alatyn jáne onyń aldyn alýǵa tıimdi sharalar qabyldaı alatyn erekshe kózqarasyn qalyptastyrady», - dedi Darhan Qydyráli.
Kóshpeli otyrysta Radıoelektronıka jáne baılanys áskerı-ınjenerlik ınstıtýtynyń ókili kýrsanttardy aqparattyq qaýipsizdikti qamtamasyz etý, aqparatty tehnıkalyq qorǵaý, shıfrly baılanys uıymdastyrý jáne júzege asyrý, áskerdi jasyryn basqarý, qupııalyq tártibi jáne qupııa is júrgizý daǵdysyna úıretý jumystary týraly aıtyp berdi. Kafedra aıasynda aqparattyq qaýipsizdik qateriniń mańyzdy túrlerine úlgi jasaý, olardyń aldyn alý, osal jaqtaryn anyqtaý jáne jeli shabýyldarynan qorǵaý jónindegi is júzindegi is-qımyldardy pysyqtaýǵa múmkindik beretin jeli qaýipsizdigin oqytý zerthanasy qurylǵany atap ótildi.
Senat depýtattary memlekettik qurylymdar men asa mańyzdy ınfraqurylym nysandaryn joǵary deńgeıdegi kıber qorǵanyspen qamtamasyz etýdiń mańyzdylyǵyn atap ótip, qarýly kúshterdi osy sala mamandarymen qamtýdaǵy ózekti máselelerdi talqylady.
Kezdesýge sonymen qatar qorǵanys, tsıfrlyq damý, ınnovatsııalar jáne aeroǵarysh ónerkásibi mınıstrlikteriniń, Ulttyq qaýipsizdik komıtetiniń jáne Qazaqstan-Brıtan tehnıkalyq ýnıversıtetiniń ókilderi qatysty.
