Senatorlar Almatydaǵy «Innovatsııalyq tehnologııalar parkinde» bas qosty
ALMATY. QazAqparat - QR Parlamenti Senatynyń Ekonomıkalyq saıasat, ınnovatsııalyq damý jáne kásipkerlik komıteti Almatyda «Innovatsııalyq tehnologııalar parki» arnaıy ekonomıkalyq aımaǵynyń ınnovatsııalyq áleýetin damytýǵa arnalǵan kóshpeli otyrys ótkizdi, dep habarlaıdy QazAqparat tilshisi.
Kóshpeli otyrysqa Senat depýtattarymen birge QR Investıtsııa jáne damý mınıstrliginiń jáne birqatar kásiporyndardyń basshylary, sarapshylary qatysty.
Kóshpeli otyrysta komıtet tóraǵasy Asqar Beısenbaev bul salada Elbasy tarapynan birqatar mańyzdy mindetter tapsyrylǵanyn atap aıtty. 
«Elbasy Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» Joldaýynda ekonomıkany jedel tehnologııalyq jańǵyrtý mańyzdy basymdyq bolyp belgilengen. Memleket basshysy joǵary oqý oryndary men «Alataý» ınnovatsııalyq tehnologııalar parki negizinde ǵylymı jáne ınnovatsııalyq áleýetti damytýdy tapsyrǵan bolatyn», - dedi Komıtet basshysy.
Jıynda arnaıy ekonomıkalyq aımaqty basqarý júıesine, AEA-daǵy salyq salý jáne keden tólemderi júıesin jetildirýge, ónimge suranysty yntalandyrý sharalaryn engizýge qatysty ózekti máseleler kóterildi.
Talqylaýdy komıtet tóraǵasy A. Beısenbaev qorytyndylap, Investıtsııa jáne damý mınıstrliginiń ókilderin «Innovatsııalyq tehnologııalar parki» ınnovatsııalyq klasteriniń strategııasyn naqtylaý barysynda kóterilgen máselelerdi qarastyrýǵa jáne barlyq qajetti sheshimderdi qabyldaýǵa shaqyrdy.
A.Beısenbaev búgingi talqylaý nátıjesi Senat depýtattarynyń tıisti zańnamalyq aktiler boıynsha jumysy kezinde eskeriletinin aıtty.
Aıta keteıik, sharaǵa qatysýshylar «Tech Garden» údetkishi negizinde uıymdastyrylǵan startap-jobalar kórmesinde jáne «Innovatsııalyq tehnologııalar parki» arnaıy ekonomıkalyq aımaqtaǵy birqatar nysandarmen tanysty. 
