Senatorlar Almaty oblysynda agroónimderden dám tatyp, zaýytta jumys istedi

TALDYQORǴAN. QazAqparat - Almaty oblysyna saparmen kelgen senatorlar halyqpen kezdesip, jańa Úkimettiń mindetteri, sonyń ishinde kópbalaly otbasylardyń ál-aýqatyn kóterý máseleleri jóninde aıtty, dep habarlaıdy QazAqparat tilshisi.

Parlament Senatynyń depýtattary saparlaryn Tekeli monoqalasyndaǵy nysandardy aralaýdan bastady. Olar aldymen Tekeli taý-ken óńdeý kesheninde bolyp, shoıyn balqytý protsesin kórdi. Jumys barysyn baqylap qana qoımaı, qoldaryna kúrek alyp, balqyǵan shoıynǵa arnaıy qospalar tastady. Bul kásiporyn 2018 jyldyń sońynda alǵashqy ónimin shyǵaryp, 2,2 mlrd teńge kiris kirgizdi. Jylyna 400 myń tonna ónim shyǵaratyn keshende 970 adam eńbek etedi.

Depýtattar toqtaǵan ekinshi nysan aýmaǵy 5,7 gektarlyq jylyjaı kesheni boldy. Jylyna 1650 tonna qııar jáne 1375 tonna qyzanaq ósire alatyn jylyjaı byltyr jóndeýden ótip, 100 mln teńgeniń ónimin óndirgen. Qııar ósirý tehnologııasymen tanysqan senatorlar balǵyn ónimnen dám de tatyp kórdi.

Sonymen qatar halyq qalaýlylaryna shahardyń jylý júıesin jańǵyrtý jumystary tanystyryldy. Qazirgi tańda «Metallýrg» yqsham aýdanyna 5 shaqyrymǵa jýyq qubyr jańadan tartylyp jatyr. Joba quny - 486 mln teńge.

Tekeli qalasynyń áleýmettik nysandaryna at basyn burǵan joǵarǵy palata ókilderi qala turǵyndarymen kezdesti. Jańadan qurylǵan Úkimettiń josparlarymen bólisip, kópbalaly otbasylarǵa kórsetiletin áleýmettik qoldaý túrlerin túsindirdi. QR Parlamenti Senatynyń depýtaty, áleýmettik-mádenı damý jáne ǵylym komıtetiniń tóraıymy Birǵanym Áıtimova aldaǵy ýaqytta kópbalaly otbasylarǵa 40 myń baspana turǵyzylatynyn atap ótti.

Onyń aıtýynsha, bul rette, «Turǵyn úı qurylys jınaq bankiniń» paıyzdyq ústeme aqysyn 2 paıyzǵa deıin tómendetý máseleleri qarastyrylyp jatyr.

«Bir páterdiń aýmaǵy kem degende 60 sharshy metr bolýy qajet. Soǵan respýblıka boıynsha 8 mln teńgeden artyq aqsha bólinse, onyń 10 paıyzy jergilikti organdardan qosylýy kerek», - dedi Áıtimova.