Senatorlar aldaǵy palata otyrysynyń kún tártibin bekitti
NUR-SULTAN. QazAqparat - Senat spıkeri Máýlen Áshimbaevtyń tóraǵalyǵymen palata bıýrosynyń otyrysy ótti. Onda 10 aqpanda ótetin Senat otyrysynyń kún tártibi bekitildi, dep habarlaıdy QazAqparat.
Soǵan sáıkes aldaǵy otyrysta Senat depýtaty Lázzat Qaltaevanyń ant berýi jáne ony Senattyń turaqty komıtetiniń quramyna saılaý týraly máseleler qaralady.
Sonymen qatar Senat otyrysynda depýtattar «Qazaqstan Respýblıkasynyń Úkimeti men Amerıka Qurama Shtattarynyń Úkimeti arasyndaǵy halyqaralyq salyq tártibin jetildirý týraly kelisimdi ratıfıkatsııalaý týraly» zań jobasyn qaraıdy. Bul qujat atalǵan eki el úkimetteriniń avtomatty aqparat almasý úshin tıimdi ınfraqurylymdy paıdalana otyryp, salyq salý máselelerinde ózara járdemdesýi arqyly halyqaralyq salyq tártibin jetildirýdi kózdeıdi.
Sondaı-aq bıýro otyrysynda Májilisten kelip túsken zań jobalary jumys úshin Senattyń turaqty komıtetterine bólinip berildi.
