Senatorlar Aqtaý qalasyndaǵy arnaıy ekonomıkalyq aımaqta boldy
Depýtattar kezdesý barysynda «Aqtaý teńiz porty» AEA qyzmetindegi birqatar mańyzdy suraqtarǵa jaýap aldy. Sondaı-aq aımaq nysandary ınfraqurylymyn qamtamasyz etý, merzimin uzartý jáne jer ýchaskelerin utymdy paıdalaný sııaqty problemalyq máselelerdi de talqylady.
Senatorlar Munaıly aýdanyndaǵy ortalyq aýrýhana qurylysynyń barysymen tanysty. Depýtattar nysandy aralaý barysynda onyń aýdanǵa qajet ekenin jáne soǵan baılanysty qurylys qarqynyn jedeldetýdiń mańyzdy ekenin atap ótti.
Senatorlar Munaıly aýdanyndaǵy Qyzyltóbe aýyldyq okrýgindegi jerasty gaz qubyryn qaıta jańartý jumystarynyń barysymen de tanysty. Ol úshin buryn respýblıkalyq bıýdjetten tıisti qarajat bólinip, qazirgi ýaqytta merdiger uıymdy anyqtaý úshin konkýrs uıymdastyrylǵan bolatyn.
Depýtattar sonymen qatar Munaıly aýdanynyń Baıandy aýylyndaǵy tuşylandyrý membranasynyń jumysymen de tanysty. Ótken jyldyń aqpan aıynda iske qosylǵan joba Munaıly aýdanyndaǵy sý tapshylyǵy máselesin sheshýge arnalǵan bolatyn. Jazǵy kezeńde bul qondyrǵy táýligine 4 000 tekshe metrge deıin aýyz sýdy tuşytty, Baıandy aýylyn aýyz sýmen qamtamasyz etti. Qysta aýyz sýdyń jetkilikti mólsherine baılanysty membrananyń jumysy toqtady.
Senatorlar aımaq turǵyndarymen kezdesýde Prezıdent Joldaýynyń negizgi baǵyttaryna toqtalyp, sapar aıasynda kóterilgen barlyq máseleler Senattyń baqylaýynda bolatynyn atap ótti.