Senatorlar Aqmola oblysynyń sharýashylyqtaryn aralady
ASTANA. QazAqparat - Qazaqstan Respýblıkasy Parlamenti Senatynyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń músheleri Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyn iske asyrý aıasynda Aqmola oblysyndaǵy Tselınograd aýdanynyń sharýashylyqtarynda boldy. Senatorlar sapar barysynda Elbasynyń Joldaýynan týyndaıtyn mindetter aıasynda veterınarlyq qaýipsizdikti kúsheıtý máseleleri boıynsha aldaǵy sharalardy talqylady.
Senat depýtattary Qosshy aýyldyq okrýginde, veterınarlyq laboratorııada bolyp, «Astana ónim» aktsıonerlik qoǵamynyń sút kesheniniń jumystarymen tanysty.
Keleshekte ekonomıkanyń jańa draıverine aınalatyn agrarlyq sektorda ekologııalyq taza ónimder men taǵamdar óndirý maqsatynda keshendi isterdi qolǵa alý kózdelip otyr. Senatorlar aýyl sharýashylyǵy eńbekkerleriniń aldynda turǵan aýqymdy mindetter týraly pikir almasty.
Sapar qorytyndysy boıynsha «Astana ónim» aktsıonerlik qoǵamy sharýashylyqtarynyń ǵımaratynda oblystyq veterınarııa basqarmasynyń basshylyǵy, Tselınograd aýdanynyń jáne de kórshiles Arshaly, Egindikól, Qorǵaljyn, Shortandy aýdandardyń bas veterınar dárigerleri, memlekettik veterınarııa ınspektsııa mamandary, aýyldyq okrýgter ákimderi, aýdannyń veterınarlyq dárigerleri, mal sharýashylyǵy uıymdary ókilderiniń qatysýymen ótken dóńgelek ústelde veterınarııa salasyndaǵy ózekti máseleler talqylandy.
Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń hatshysy Jeńis Nurǵalıev Elbasy Joldaýyndaǵy aýyl sharýashylyǵy máseleleri boıynsha qoıylyp otyrǵan mindetter týraly aıta kelip, olardy zańnamalyq iske asyrý jónindegi aqparattarmen tanystyrdy. Dóńgelek ústel otyrysy barysynda kóterilgen ózekti máseleler 24 aqpanǵa Senatta josparlanyp otyrǵan Aýyl sharýashylyǵy mınıstrliginiń basshylyǵy men veterınarııa salasyndaǵy ǵalymdarmen kezdesýde qaralatyny aıtyldy.
