Senatorlar agroónerkásip kesheni zańnamalaryn jetildirý máselelerin talqylady
TANA. 30 qarasha. QazAqparat /Qanat Mámetqazyuly/ - Búgin QR Parlamenti Senaty Agrarlyq máseleler jáne qorshaǵan ortany qorǵaý komıteti Aýyl sharýashylyǵy mınıstrliginiń basshylarymen kezdesti.
Onda agroónerkásip kesheni salasyna qatysty zańnamalardy jetildirý, quqyqtyq qatynastardy retteý máseleleri talqylandy.
Qazaqstan agrarly memleket jáne agroónerkásip kesheni onyń ekonomıkasynyń mańyzdy salasy bolyp tabylady. Sondyqtan da, elimizde osy salaǵa basymdyq berilýde.
«Elbasy Nursultan Nazarbaev 2011 jylǵy 3 mamyrda ótken Astanalyq ekonomıkalyq forýmda óz sózinde búgingi álem ekonomıkasynyń aldynda negizgi úsh ekonomıkalyq maqsat turǵanyn atap kórsetken bolatyn. Olar: qarjy, ındýstrııalyq ınnovatsııa jáne azyq-túlik qory. Azyq-túlik qorynyń resýrstaryn damytý azyq-túlik qaýipsizdigin qamtamasyz etý bolyp tabylady. Azyq-túlikke baılanysty daǵdarys zardaptary - bul áleýmettik jáne saıası jaǵdaılardyń asqynýy. Táýelsizdiktiń 20 jyldyǵy ishinde, ásirese sońǵy jyldary memlekettik qurylys sheńberinde otandyq aýyl sharýashylyǵynyń ónimdiligin, básekelestigin kóterý úshin zańnamalyq baza qalyptasty», - dedi jıyndy ashyp sóz sóılegen komıtet tóraǵasy Bolat Jylqyshıev. Onyń aıtýynsha, qazirgi ýaqytta agroónerkásip kesheniniń zańnamalyq bazasyn odan ári keńeıtý men jetildirý, ony halyqaralyq tájirıbe normalarymen sáıkestendirý boıynsha aýqymdy jumystar júrgizilýde. Osy rette jeke bastamashylyqty damytý úshin qaǵıdaly jańa jaǵdaılar jasaıtyn jáne azamattarǵa tabıǵat resýrstaryn paıdalanǵany úshin jaýapkershilikti memleketpen bólisýge múmkindik týǵyzatyn Sý jáne Orman kodeksterin qabyldaý aıryqsha oryn alady.
Kezdesý barysynda Aýyl sharýashylyǵy mınıstri Asyljan Mamytbekov agroónerkásip kesheni salasyna qatysty zańnamalardy jetildirý, quqyqtyq retteý máseleleri boıynsha baıandama jasady. Sonymen qatar, kezdesý barysynda aldaǵy ýaqytqa josparlanǵan zańnamalyq qamtý sharalary talqylandy.
