Senatorlar agrarlyq ǵylymdy damytýdyń perspektıvalaryn talqylady
Atalǵan ýnıversıtettiń baspasóz qyzmeti taratqan aqparatqa qaraǵanda, shara barysynda agroónerkásiptik keshendi damytý týraly zańnamany jetildirýmen qatar ekonomıkanyń strategııalyq mańyzdy salalarynda irgeli, qoldanbaly zertteýlerdi júrgizý jumystaryn jandandyrý kerektigi sóz boldy. Osyǵan baılanysty elimizdegi aýyl sharýashylyǵy salasy boıynsha mamandar daıarlaıtyn bilim ordalarynyń zaman talabyna saı bolýy da nazardan tys qalǵan joq. Ol úshin bul salada jetistikke jetken elderdegideı bilim oshaqtaryn ǵylymı zertteý ýnıversıtetterine aınaldyrý máselesin jedeldetý kerektigi aıtyldy.
«Qatysýshylar aýyl sharýashylyǵyn damytý maqsatynda elde salaǵa baılanysty arnaıy aqparat quraldarynyń azdyǵy da onyńalǵa jyljýyna kedergi keltiretindigin atap ótti. Sondaı-aq depýtattar ýnıversıtettiń ınjenerlik kadrlardy daıarlaý jáne qaıta daıarlaý máselesimen tanysyp, geoaqparattyq júıeler boıynsha Qazaq-Koreı ortalyǵy, Big Data ortalyǵy, Jasandy ıntellekt ortalyǵynda boldy. Sonymen qosa ýnıversıtette shyǵarylǵan ónimder depýtattar nazaryna usynyldy», - dep atap ótedi bilim oshaǵynyń baspasóz qyzmetinen.
Kóshpeli otyrys barysynda ýnıversıtet rektory Aqylbek Kúrishbaev búgingi tańda QazATÝ elimizdegi iri agrarlyq zertteý ýnıversıtet bolýǵa daıyn ekenindigin málimdedi. Munan bólek ǵylymı jáne kadrlyq múmkindikterge saı mamandar daıarlap, aýyl sharýashylyǵynda senimdi seriktes bolýǵa múmkindigi bar ekendigin atap ótti.
«Osyǵan oraı ýnıversıtetimizde agrarlyq sektordyń ekonomıkasyna arnalǵan jańa formattaǵy mamandardy daıarlaýǵa baǵyttalǵan halyqaralyq joba júzege asyrylatyn bolady. Aldaǵy ýaqytta QazATÝ Frantsııadaǵy AgroParisTech ýnıversıtetimen birge qosdıplomdyq bilim berý júıesine kóshý men oqý baǵdarlamalaryn jańǵyrtý boıynsha jol kartasyn jetildirip jatyr», - dedi Aqylbek Kúrishbaev.
