Senator: Jylý elektr ortalyqtarynyń jaǵdaıy óte nashar
Senatordyń atap ótýinshe, Ekibastuz, Petropavl, Rıdder jáne Stepnogorsk qalalaryndaǵy jylý elektr ortalyqtaryndaǵy apattar osy salada kóptegen jyldar boıy jınaqtalǵan júıeli problemalardyń saldary bolyp otyr.
«Bıylǵy jyldyń basynda «Óńir» depýtattyq toby Ekonomıkalyq saıasat, ınnovatsııalyq damý jáne kásipkerlik komıtetimen birlesip, elektr energetıkasyn damytý máseleleri boıynsha Úkimetke jylý berý maýsymyna daıyndyq pen oǵan jaýapkershilikti kúsheıtý jáne barlyq óńirlerdegi sýbektiler boıynsha tehnıkalyq aýdıt júrgizýdi jedeldetý jóninde sharalar qabyldaýdy usyndy. Bul naqty tehnıkalyq jaǵdaıdy baǵalaý, sondaı-aq olardy jańǵyrtý, jańartý jáne jóndeýge qajetti qarjylyq resýrstardy anyqtaý úshin jasalýy kerek edi. Alaıda, Úkimet mundaı sheshimge Ekibastuz qalasyndaǵy bolǵan iri apattan keıin ǵana kelip otyr», - dedi senator.
Depýtat jylý energııasyn óndirý, jiberý jáne jetkizý salasyndaǵy jaǵdaı óte nashar deńgeıge jetti dep esepteıdi. 2022 jylǵy 1 qańtardaǵy jaǵdaı boıynsha JEO jabdyqtarynyń tozýy ortasha alǵanda 66 paıyzǵa deıin, al elimizdiń keıbir qalalarynda 80 paıyzǵa deıin jetedi. Elimizdegi jylý jelileriniń shamamen 30 paıyzy tolyq aýystyrýdy qajet etedi, bul – shamamen 3,5 myń shaqyrym qubyr.
«Osyǵan baılanysty, jylýmen jabdyqtaý salasynda tıimdi memlekettik saıasat qalyptastyrýǵa, ortalyqtandyrylǵan jylýmen jabdyqtaý naryǵy sýbektileriniń ózara qarym-qatynasyn, jylý energetıkalyq baqylaý máselelerin retteýge múmkindik beretin salalyq zań qabyldaýdy usynamyz. Naryq sýbektileri arasyndaǵy jylý óndirýshi, jylý jetkizýshi jáne jylýmen jabdyqtaýshy uıymdardyń básekelestigi deńgeıiniń tómendigin eskere otyryp, salany basqarý júıesinde qurylymdyq ózgerister júrgizilsin», - delingen depýtattyq saýalda.
