Senator jolaýshylar tasymalynda jaýapkershilikti kúsheıtýdi surady
NUR-SULTAN. QazAqparat - Parlament Senatynyń depýtaty elordadaǵy avtobýs apatyna baılanysty jolaýshylar tasymaly salasynda jaýapkershilikti kúsheıtýdi surady, dep habarlaıdy QazAqparat tilshisi.
«Jolaýshylar tasymaly kóptegen adamdarǵa qatysty bolatynyn jáne qaýipsizdikti talap etetinin eskere otyryp, tehnıkalyq ári medıtsınalyq tekserýdi júzege asyratyn zańdy tulǵalar men jeke kásipkerlerdiń qyzmetine baqylaýdy jáne jaýapkershilikti kúsheıtý máselesin qaraý qajet dep esepteımin», - dedi senator Georgıı Kım Úkimet basshysy Asqar Mamınge joldaǵan depýtattyq saýalynda.
Osy oraıda ol qoldanystaǵy zańnamaǵa sáıkes, jolaýshylar qozǵalysynyń qaýipsizdigi úshin kólikter tehnıkalyq baıqaýdan ótip, júrgizýshi medıtsınalyq turǵyda tekseriletinin eske saldy.
QR Indýstrııa jáne ınfraqurylymdyq damý mınıstrliginiń buıryǵyna sáıkes, operatorlardyń tizilimine engizilgen zańdy tulǵalar nemese jeke kásipkerler kólikti tehnıkalyq baıqaýdan ótkizýge jaýap beredi. Sonymen qatar, QR Densaýlyq saqtaý mınıstrliginiń buıryǵyna sáıkes, dárigerlik tekserýlerge zańdy tulǵalar nemese jeke kásipkerler jaldaǵan medıtsına qyzmetkerleri jaýapty bolady.
Esterińizge sala keteıik, 26 naýryz kúni Uly Dala men Qabanbaı batyr dańǵyly qıylysynda úsh avtobýstyń jáne jeńil kóliktiń qaqtyǵysýymen jol-kólik oqıǵasy oryn aldy. Qalamańy baǵdaryndaǵy № 301 avtobýs № 12 baǵdardaǵy jolaýshylar avtobýsymen soqtyǵysty. Osynyń ekpinimen olar № 53 avtobýsqa jáne jedel járdem kóligine baryp soǵyldy.
Kólik apaty saldarynan eki adam kóz jumyp, 36 adam zardap shekti.
