Senator: jol erejesin júıeli túrde buzatyndardy qatań jaýapqa tartý kerek
ASTANA. KAZINFORM – Senat depýtaty Marat Qojaev júrgizýshilerdiń 5 paıyzy jol erejesin júıeli túrde buzatynyn aıtty.
- Osyǵan qatysty talaı usynys boldy. Byltyr ózimniń depýtattyq saýalymda jol erejesin júıeli túrde buzatyndardy qatań jaýapqa tartý kerek ekenin jarııaladym. Bul turǵyda jol erejesin jıi buzatyndarǵa aıyppul tóleýde 50% jeńildikti alyp tastaý kerek. Sonymen qatar, kóp ereje buzý deregi bar júrgizýshilerdi jol júrisi qaǵıdalary boıynsha emtıhandy qaıta tapsyrýǵa jiberýdi mindetti etý usynysyn da aıttym. Sondyqtan osy máselelerdi Úkimetpen birge pysyqtap, aldaǵy ýaqytta qaralatyn zań jobalaryna atalǵan usynystardy engizý josparlanyp otyr. Statıstıkaǵa súıensek, júrgizýshilerdiń 94 paıyzdan astamy jol erejesin qatań oryndap júr. Shamamen júrgizýshilerdiń 5-6 paıyzy erejeni júıeli túrde buzyp turady. Dál osylarǵa qatysty jaýapkershilikti qatańdatý kerek, - dedi M. Qojaev Senattyń jalpy otyrysynan keıin tilshiler suraǵyna jaýap bere otyryp.
Munymen qosa ol úsh adamnyń ómirin qıǵan Almatydaǵy iri jol-kólik oqıǵasyna qatysty pikir aıtty.
- Qazir bul apatqa qatysty áleýmettik jelide túrli aqparat tarap jatyr. Polıtsııa sonyń bárin tekseredi. Bul derekter dáleldenip jatsa, kináliler jaýapqa tartylady, - dedi senator.
Budan buryn habarlanǵandaı, jaqynda Almatyda jol apatynan úsh adam qaza tapty.
Eske salsaq, buǵan deıin Senat depýtaty Marat Qojaev jol erejesin jıi buzatyndar aıyppuldy joǵary somada tóleýi kerek ekenin aıtty.
