Senator jol erejesin jıi buzatyndarǵa aıyppul boıynsha jeńildik bermeýdi usyndy

ASTANA. KAZINFORM — Senat depýtaty Marat Qojaev jol erejesin jıi buzatyndar aıyppuldy joǵary somada tóleýi kerek ekenin aıtty. 

Atap aıtqanda, elimizde jol erejesin buzǵandar aıyppul salynǵan kúnnen bastap bir aptanyń ishinde tólese, onda osy aıyppuldyń jartysyn ǵana óteý múmkindigi jasalǵan. Alaıda senator bul jeńildik jol erejesin tym kóp buzatyndarǵa qoldanylmaýy kerek ekenin málim etti.

— Osyǵan deıin jylyna on retten artyq bir tıpti jol erejesin júıeli túrde buzatyndardy bul jeńildikten aıyrýdy usyndym. Olar bir jylda erejeni onnan artyq buzsa, ıaǵnı 11-shi, 12-shi aıyppuldyń somasyn tolyq tóleýge mindetti bolýi tıis, — dedi Marat Qojaev Senatta tilshiler suraǵyna jaýap bere otyryp.

Senator bul bastama Úkimet tarapynan qaralyp, qoldaý tapqanyn habarlady.

— Menińshe, bul salada keıbir ózgerister bolady… Ákimshilik zańnamaǵa kelesi ózgerister engizilgen kezde, osy túzetýlerge bastamashy bolamyn dep oılaımyn, — dedi depýtat.

Eske salsaq, byltyr aqpan aıynda senator Marat Qojaev jol erejesin jıi buzatyndarǵa aıyppul tóleýde 50% jeńildikti alyp tastaýdy usynǵan edi.