Senator Jezqazǵanda aýyz sýmen qamtamasyz etýdegi problemany aıtty
Senator Keńgir sý qoımasy – jezqazǵandyqtardyń aýyz sýynyń negizgi kózi ekenin aıta kelip, onyń áli kúnge deıin jekemenshikte ekenin, biraq zań boıynsha ol memlekettik menshikte bolýy tıis ekenin atap ótti. Ony 1996 jyly Úkimettiń qaýlysy boıynsha memlekettik basqarýǵa qaıtarý kerek bolatyn.
«Biraq bul mindet ártúrli syltaýmen oryndalmady. Osylaısha, strategııalyq mańyzy zor nysan «Sý kodeksiniń» jáne «Memlekettik múlik týraly» zań talabyna saı jeke menshik qolynan memleket ıeligine qaıtarylmaı qaldy. Qazir Keńgir sý qoımasy gıdrotehnıkalyq qurylymdarymen birge «Qazaqmys Dıstrıbıýshn» JShS-niń ıeliginde», - dedi senator.
Rysqalı Ábdikerov sonymen qatar Jezdi sý qoımasyna qatysty máselelerdi de aıtty. Ol Jezqazǵan jáne Sátbaev qalalarynyń turǵyndaryn kókónistermen jáne et-sút ónimderimen qamtamasyz etýge kómektesýi tıis edi. 2011 jyly Úkimet qaýlysynda Jezdi sý qoımasyn Talap sýarý júıesiniń magıstraldyq kanalymen qaıta jańartý kózdelgen bolatyn. Ókinishke qaraı, senator atap ótkendeı, óńirge arnalǵan ózekti joba qaǵaz júzinde ǵana qaldy.
«Osyǵan baılanysty Keńgir jáne Jezdi sý qoımalarynyń mártebesi zańdy túrde qashan retteledi degen suraqqa jaýap berýińizdi suraımyn, Jezqazǵan qalasyn jer asty sýymen tolyqtaı qamtamasyz etý máselesin sheshý jospary Úkimette bar ma? Memleket basshysynyń ótken jyldyń qazan aıyndaǵy «Úkimet ákimdikpen jáne korporatsııamen birlese otyryp, adamdardy taza aýyz sýmen qamtamasyz etýdi qysqa merzimde jáne bir jarym jyldan aspaıtyn merzim ishinde sheshýi tıis» degen tapsyrmasy qandaı merzimde oryndalady?»,- dedi senator Ábdikerov óziniń depýtattyq saýalynda.
