Senator jergilikti joldardyń sapasyna qatysty problemany atady
ASTANA. KAZINFORM – Jergilikti joldardyń barlyq ýchaskesine dıagnostıka men pasporttaý júrgizý qajet. Bul týraly Senatta joldardyń máselesin talqylaýǵa arnalǵan Úkimet saǵatynda senator Álibek Náýtıev málim etti.
- Halyqaralyq jáne respýblıkalyq mańyzy bar avtomobıl joldarynyń jalpy uzyndyǵy shamamen 25 myń km, al jergilikti mańyzy bar avtomobıl joldarynyń jalpy uzyndyǵy 70 myń shaqyrym. Kólik mınıstrliginiń derekterine súıensek, respýblıkalyq jáne jergilikti mańyzy bar joldardyń normatıvtik jaı-kúıiniń kórsetkishteri birkelki jaqsy deńgeıde. Birinshiden, memlekettik josparlaýdyń jetkiliksizdigine toqtalsaq, bul másele jergilikti mańyzy bar joldarǵa qatysty. Kólik mınıstrliginiń málimetinshe, jergilikti joldardyń 89%-y normatıvtik deńgeıge saı. Degenmen bul kórsetkish, halyqtyń shaǵymdaryn eskere otyryp, belgili bir kúmán týdyrady. Joldardy jóndeýge barlyq óńir úshin biryńǵaı tásilderdiń qoldanatynyna qaramastan, oblystar bólinisinde joldardyń jaı-kúıinde aıtarlyqtaı alshaqtyq baıqalady. Mysaly, eger Jambyl oblysynda joldardyń 99% normatıvtik jaǵdaıda bolsa, Batys Qazaqstan oblysynda bul kórsetkish 2 ese tómen jáne tek 56%, - dedi Á.Náýtıev.
Onyń paıymynsha, qoldanystaǵy naqty jaǵdaıdy anyqtaý jáne jóndeý jumystaryn qarjylandyrýdyń ońtaıly tetigin ázirleý úshin jergilikti joldardyń barlyq ýchaskesine dıagnostıka men pasporttaý júrgizý qajet. Mundaı dıagnostıkanyń qorytyndysy boıynsha eń problemaly ýchaskeler anyqtalady, anyqtalǵan aqaýlardyń sıpatyna saı jóndeý túrleri, sondaı-aq qyzmet etý merzimin boljaý aıqyndalady. Óńirler bólinisinde barlyq deńgeıdegi avtomobıl joldarynyń jaı-kúıiniń senimdi derekteri bar biryńǵaı bazasy bolýy tıis.
- Senattyń Ekonomıkalyq saıasat, ınnovatsııalyq damý jáne kásipkerlik komıteti 2023 jyly óńirlerdi damytý jónindegi Parlamenttik tyńdaýdyń qorytyndysy boıynsha Úkimetke atalǵan pasporttaýdy júrgizýdi usynǵan bolatyn. Alaıda, qazirgi kezde dıagnostıka tek respýblıkalyq mańyzy bar avtojoldarda tolyq kólemde júrgiziledi. Al jergilikti mańyzy bar joldar máselesi áli de ózekti. Mundaı jumystar tolyq atqarylsa, bul joldardyń aǵymdaǵy jaǵdaıyn anyqtaý jáne jóndeý jumystaryn qarjylandyrýdyń ońtaıly mehanızmin ázirleý úshin mańyzdy. Bul rette, mundaı mehanızm óńirlerdiń talap etiletin qajettilikterine saı bolýy kerek jáne ákimderdiń «bedeline» nemese qandaı da bir jeke qalaýyna, sondaı-aq basqa da sýbektıvti faktorlarǵa baılanysty bolmaýy tıis, - dedi depýtat.
Buǵan deıin SQO-da respýblıkalyq mańyzy bar «Jezqazǵan — Petropavl» tas joly jóndelip jatqanyn jazǵan edik.