Senator jer qoınaýyn paıdalanýshylardyń jumysyna narazy ekenin aıtty
NUR-SULTAN. QazAqparat – Senator Ǵumar Dúısembaev Úkimet basshysy Álıhan Smaıylovtyń atyna joldaǵan depýtattyq saýalynda Atyraý jáne Mańǵystaý oblystaryndaǵy aýyz sý tapshylyǵyna qatysty problemalardy atap ótti, dep habarlaıdy QazAqparat tilshisi.
Senator Teńiz jáne Qashaǵan ken oryndaryn ıgerýdi belsendi túrde ulǵaıtý, sondaı-aq Atyraý munaı-hımııa parkin damytý jáne gaz óńdeý zaýytyn salý taıaý bolashaqta sý tapshylyǵynyń artýyna alyp keledi dep sanaıdy. Ol ásirese Atyraý oblysynyń Isataı, Jyloı aýdandary men Qulsary qalasynyń turǵyndaryna qatysty bolýy yqtımal, mundaǵy turǵyndar qazirgi kezdiń ózinde jaz mezgilinde sýdy saǵat boıynsha alady.
Bul máseleni sheshýge «Kókjıde» tuşy sý erekshe ken orny kómektese alar edi. Ol Aqtóbe jáne Atyraý oblystarynyń shekarasynda Muǵaljar aýdanynda ornalasqan batys óńirdegi eń iri tuşy sý kózi. Alaıda, senator jer qoınaýyn paıdalanýshylar osy ken orny aýmaǵy men dál janynan uńǵyma qazyp, izdestirý jumystaryn júrgizip, jer asty sýynyń lastanýyna ákelýi múmkin dep alańdap otyr. Al taza sý kózi lastanǵan jaǵdaıda týyndaıtyn shyǵyn jer qoınaýyn paıdalanýshylardan túsetin kiristermen salystyrýǵa kelmeıdi.
«Osy gıdrogeologııalyq obektidegi jerasty sýynyń jaı-kúıine turaqty monıtorıng júrgizý úshin biryńǵaı operatordy aıqyndaý máselesin qaraýdy suraımyz. Kókjıde mekeninde ekologııalyq jaǵdaıdyń nasharlaýyna jáne jer asty sýynyń lastanýyna jol bermeý úshin qoldanystaǵy munaı óndirýge arnalǵan kelisimsharttardy zerdeleý kerek. Qajet bolǵan jaǵdaıda, munaı kompanııalaryna odan ári izdestirý jumystaryn júrgizýge tyıym salý jáne kelisimsharttardy uzartpaý kerek», - dep atap ótti senator.
