Senator jer asty sýynyń lastaný problemasyn sheshýdi baqylaýda ustaıtyn bolady
NUR-SULTAN. QazAqparat - Senator Bekbolat Orynbekovtiń aımaqqa saparyndaǵy negizgi maqsattardyń biri – Jambyl aýdanyndaǵy bes eldi mekenindegi jer asty sýynyń lastaný máselesin sheshý boldy. Jambyl oblysy ákimdigi men «Jambyl-Sý»kompanııasynyń ókilderi jaǵdaıdy jergilikti jerde talqylaý úshin shaqyryldy, dep habarlaıdy QazAqparat.
Senator kezdesý barysynda aımaq turǵyndary aıtqan osy máseleni Mınıstrler Kabıneti basshylyǵynyń atyna joldaǵan depýtattyq saýalynda Úkimet aldynda kótergenin atap ótti.
«Aýyl sharýashylyǵyna tıisti alqaptar batpaqtanyp barady jáne jyl saıyn sý astynda qalyp ketip otyr. Qalyptasqan ekologııalyq jaǵdaıdy tez arada sheshý úshin meniń bastamam boıynsha Senat depýtattary tobynyń atynan QR Premer-Mınıstriniń atyna depýtattyq saýal joldandy. Qazir bul másele QR Indýstrııa jáne ınfraqurylymdyq damý mınıstrligi men oblys ákiminiń turaqty baqylaýynda» , - dedi Bekbolat Orynbekov.
Osyǵan baılanysty oblys ákimdigine jáne kásiporyn ókilderine qosymsha kartalar ázirleý jáne jumys istep turǵan tundyrǵyshtardy tazalaý máselesin qysqa merzimde sheshý tapsyryldy.
Bekbolat Orynbekov sapar barysynda Jambyl aýdanynyń 13 eldi mekenin gazdandyrý jumysynyń barysymen tanysyp, bıýdjet qarjysynyń tolyq bólinbeýine baılanysty gazǵa áli qosylmaǵan Aşybulaq aýylynyń turǵyndarymen de kezdesti.
