Senator jaıylym jer týraly másele kóterdi: 21 mln gektar degradatsııaǵa ushyraǵan

NUR-SULTAN. QazAqparat - Jer máselesin ulttyq deńgeıdegi mańyzdy joba retinde júıeli túrde qarastyrmasa jaıylym máselesi sheshimin tappaıdy. Bul týraly Senattyń jalpy otyrysynda depýtat Sultan Dúısembınov Úkimet basshysynyń atyna joldaǵan saýalynda aıtty, dep habarlaıdy QazAqparat tilshisi.

«Jaıylymdyq jer tapshylyǵy barlyq oblystar boıynsha oryn alyp otyr. Máselen, Túrkistan, Almaty, Jambyl jáne Qyzylorda oblystarynda aýyl turǵyndary jaıylymdardyń jetispeýshiliginen zardap shegýde. Eldi mekenderde maldyń 80%-ǵa jýyǵy aýyl sheginde jáne onyń aınalasynda jaıylatyndyqtan, buryn bólingen shamamen 21 mln ga jaıylymdyq jer degradatsııaǵa ushyraǵan», - dedi Sultan Dúısembınov.

Senator jaıylymnyń tapshylyǵyn sheshý úshin jaıylymdardy uzaq merzimdi basqarý jónindegi josparlardy bekitý qajet ekenin jáne paıdalanylmaı jatqan jerlerdi memleketke qaıtarý boıynsha belsendi jumys júrgizý kerek ekenin aıtty.

«Búginde aýyldyq eldi mekenderde mal sharýashylyǵy óniminiń 66%-y óndiriledi. Biraq mundaı orasan bıologııalyq aktıv memlekettik qoldaýdan tys qalyp, zamanaýı tehnologııalyq protsesterge tartylmaı otyr. Jeke qosalqy sharýashylyqtardy kooperatıvtendirý boıynsha júrgizilgen jumystar durys úılestirilmegendikten nátıjeli bolmaı otyr», - dedi depýtat.

Senatordyń aıtýynsha, qazirgi ýaqytta damyǵan elderdiń barlyǵy aýyl sharýashylyǵynda kooperatsııa tetigin tabysty paıdalanýda. Bul aýyldyq jerlerde eńbek ónimdiligin arttyrýǵa, qala halqyn sapaly jəne arzan tamaq ónimderimen qamtamasyz etýge, turaqty jumys oryndaryn ashýǵa zor septigin tıgizedi.